نړیوال دې په افغانستان کې روانه تپل شوې خونړۍ جګړه ودروي. د ملګرو ملتونو په امنیت شورا کې د افغانستان په اړه غونډه جوړه شوې وه. په دغه غونډه کې د افغانستان لپاره د ملګرو ملتونو استازي، په ملګرو ملتونو کې د افغانستان دایمې استازې، د ملګرو ملتونو لپاره د افغان ځوانانو استازې او د دغه شورا غړو هېوادونو استازو ګډون کړی و. دوی په افغانستان کې پر روان وضعیت، سولې او امنیتي مسایلو خبرې کړې دي. په ملګرو ملتونو کې د افغان ځوانانو استازې عایشې خُرم ویلي چې دلته یوه تپل شوې جګړه روانه ده چې د یوې سترې لوبې برخه ده.
تېره ورځ د ملګرو ملتونو امنیت شورا د افغانستان په اړه ځانګړې غونډه جوړه کړې وه. په دغه غونډه کې په ملګرو ملتونو کې د افغان ځوانانو استازې عایشې خُرم وویل چې په افغانستان کې یوه تپل شوې خونړۍ جګړه روانه ده او دا جګړه د یوې لویې خونړۍ نړیوالې لوبې برخه ده. د نوموړې په وینا، دا جګړه پر افغانانو تپل شوې او په خبره یې، هېڅ افغان ځوان د دغه جګړې پیلوونکی نه دی او نه یې هم دوام غواړي.
نوموړې د ملګرو ملتونو په امنیت شورا کې د خبرو پر مهال وویل، چې دلته روانه خونړۍ جګړه یوازې له افغانانو قرباني اخلي، په داسې حال کې چې اصلي لوبغاړي یې نور دي او له بهره کنټرولېږي. نوموړې ټینګار وکړ چې افغانان د خپلې خوښې پرخلاف په دې جګړه کې ښکېل شوي او د دې جګړې اصلي قربانیان دي. د نوموړې په خبره: ((دا جګړه د افغانستان پر خلکو تپل شوې، د سترې لوبې تولید دی، موږ له خپلې خوښې پرته پکې ښکیل کړای شوي یو، او اصلي قربانیان یې هم موږ یو)).
عایشې خُرم له اسنادو او شواهدو سره ویلي چې په تېرو کلون کې هوایي بریدونو، شپنیو عملیاتو او خونړیو چاپو دغه جګړه نه ده کمه کړې، بلکې ورځ تر بلې یې خونړۍ کړې او د ملکي وګړو مرګ ژوبله یې لوړه کړې ده. هغه زیاتوي چې دې جګړې اوس خپل ماهیت بدل کړی او د ترهګرۍ ضد جګړه د عامو افغانانو ضد جګړې باندې اوښتې ده. د نوموړې په خبره: ((افغانستان کې روانه جګړه نور یوازې د ترهګرۍ ضد جګړه نه ده. دا اوس د هغو بې ګناه افغانانو پر وړاندې جګړه ده چې یوازینۍ هیله یې سوله ده. که د افغانستان په ګوټ ګوټ کې د دغه روان ناورین د قربانیانو نارې واورئ، نو ټول همدا وايي چې، جکړه ودروئ، وژنې بندې کړئ د افغانانو کلي هېچا ته خطر نه دي)).
عایشې خُرم په دغه غونډه کې له ملګرو ملتونو په تېره امنیت شورا وغوښتل چې د افغانستان د سولې په پروسه کې رښتینی او عملي رول ولوبوي. د نوموړې په وینا، سوله د هر افغان هيله ده او ټول افغانان د سولې غوښتونکي دي، نو له همدې امله د ټولو عامو افغانانو په تېره افغان ځوانانو هیله دا ده چې ملګري ملتونه او د دغه سازمان امنیت شورا د افغان سولې په برخه کې مثبت رول ولوبوي. عایشه خُرم وایي، افغانستان د تاریخ په مهمه مرحله کې دی او د دې اړتیا ده چې ملګري ملتونه خپل رښتینی مسوولیت ادا کړي. د آغلې خُرم په خبره: ((موږ د تاریخ په دې مهم پړاو کې د ملګرو ملتونو د امنیت شورا صادقانه او نه ستړی کیدونکې هلې ځلې غواړو، چې یو فعال رول ولوبوي او د سولې توافقنامه کې زموږ د حقونو ضانت کوونکی واوسي)).
د عایشې خُرم تر څنګ په دې غونډه کې د یوناما مشر تادامیچي یاماموتو هم دلته د سولې پر اهمیت خبرې وکړې او زیاته یې کړه چې افغانان تر بل هر وخت اوس ډېر د سولې تږي دي او باید نړیوال په دې برخه کې هر اړخیزه همکاري وکړي. د چین او جرمني استازو هم په دې غونډه کې خبرې کړي دي. چینايي استازي په افغانستان کې د امریکايي ځواکونو هوایي بریدونه او خونړي عملیات د جګړو د پراختیا لامل بللي او ددغه ځواکونو د مسوولانه وتلو غوښتنه یې کړې ده. جرمني بیا ویلي چې دوی د سولې په برخه کې هر راز مرستو او همکاریو ته تیار دي.
