واشنګټن پوسټ: د افغان جګړې په اړه (دروغو) وحشیانه پایلې لرلې دي

د افغان جګړې په اړه دروغ ویونکي کسان باید خلکو ته ځواب ووايي. واشنګټن پوسټ په یوه تازه مقاله کې ویلي چې د دوی راپور د افغان جګړې په اړه سم دی او اوس ددې وخت دی چې په دې اړه دروغ ویونکي کسان ولس ته وضاحت ورکړي. سرچینه کاږي چې جنرالانو، ديپلوماتانو، ولسمشرانو، پوځي افسرانو او نورو سلګونه کسانو په دغه دروغو او تېر ایستلو کې لاس درلود. په مطلب کې راځي دغه دروغو د امریکا او افغانستان لپاره وحشیانه او خونړۍ پایلې لرلې چې له امله یې زرګونه کسان ووژل شول او میلیاردونه ډالر ولګول شول. واشنګټن پوسټ لیکي، امریکايي چارواکو نه یوازې دا چې د افغان جګړې په اړه دروغ ویل بلکې هغه کسان یې هم مسخره کول چې ددغه جګړې په اړه یې حقایق ویل. یاده ورځپاڼه په دغه مقاله کې وايي امریکايي جنرالان له لومړي سره پوهېدل چې دا جګړه یو ناورین دی نو باید له دومره ښکېلتیا یې ډډه کړې وای.