له نږدې یوه کال سفرونو، بحثونو، خبرو او کنفرانسونو وروسته، امریکا او طالبانو پرون د سولې هوکړه لاسلیک کړه. دوی په هوکړه کې پر مهمو مسایلو توافق کړی دی او د طالبانو مشر له خپلو وسله والو غوښتي چې د هوکړې موادو ته ژمن پاتې شي. د دې تر څنګ، په کابل کې هم د افغان حکومت، امریکا او ناټو له لوري ګډه اعلامیه خپره شوه او په هغه کې د دریو واړو لورو تر منځ د همکاریو پر دوام او ملاتړ خبرې شوې دي.
پرون د فبرورۍ په ۲۹مه د افغانستان لپاره خورا تاریخي ورځ وه. په دوحه کې د امریکا او طالبانو تر منځ د سولې هوکړه لاسلیک شوه او په کابل کې بیا د ناټو، افغان حکومت او امریکا له لوري ګډه اعلامیه خپره شوه. د طالبانو په هوکړه کې راغلي چې بهرني ځواکونه به له افغانستانه وځي، افغان خاوره به د هېڅ بهرني هېواد پر وړاندې نه کارول کېږي، طالب زندانیان به ازادېږي او بین الافغاني خبرې به پیلېږي.
د اعلامیې له مخې، افغان لوری به د مارچ تر لسمې چې د بین الافغاني خبرو لپاره د پیل نېټه ټاکل شوې، پنځه زره طالب بندیان ازادوي. په مقابل کې به یې طالبان هم د افغان حکومت زر کسه بندیان ازاد کړي. همدا راز به امریکا په ۱۳۵ ورځو کې خپل ځواکونه په افغانستان کې له څه باندې ۱۲ زرو عسکرو ۸۶۰۰ کسانو ته راټيټوي او تر څنګ به یې له پنځو نظامي اډو خپل پوځیان وباسي. همدا راز په توافق کې راغلي چې د امریکا نور متعهدین به هم د خپلو ځواکونو کمولو ته ادامه ورکوي او په دې توګه به د مهالوېش له مخې، بهرني ځواکونه له افغانستان څخه وځي. همدا راز د توافق له مخې امریکا بیا ژمنه ده چې په ۱۴میاشتو کې خپل ټول ځواکونه له افغانستانه وباسي. د امریکا متعهدین هم اړ دي چې د دې هوکړې له مخې په نهه نیمو میاشتو کې خپل ټول سرتېري له افغانستانه وباسي.
په هوکړه کې د بندیانو د خوشې کولو په اړه هم خبرې شوې دي. هوکړه شوې چې بندیان به د هوکړې له موادو سره سم ازادېږي او دغه خوشي شوي بندیان به د هېڅ لوري امنیت ته ګواښ او خطر نه پېښوي.
طالبانو همدا راز له امریکا غوښتي چې دغه هوکړه به په امنیت شورا کې تاییدوي او همدا راز به امریکا له طالبانو سره د نوي حکومت د جوړېدو پر مهال خپلې همکارۍ جاري ساتي. دوی هوکړه کړې چې له امریکا سره به د دوی اړیکې دوستانه وي، خو امریکايي لوری به د افغانستان په چارو کې هېڅ راز مداخله نه کوي.
د طالبانو مشر ملا هیبت الله اخند بیا په یوه اعلامیه کې د دې هوکړې لاسلیک ستره بریا بللې ده. ده پر خپلو وسله والو غږ کړی چې په هېڅ صورت دغه هوکړه ماته نه کړي او ټولو موادو ته یې ژمن پاتې شي. ملا هیبت الله پر خپلو کسانو دا غږ هم کړی چې د راتلونکو اقداماتو لپاره دې خپلې لیکې پیاوړې وساتي.
د هوکړې له مخې به بین الافغاني خبرې د مارچ په لسمه نېټه پيلېږي او په هغه کې به د راتلونکي حکومت پر څرنګوالي او دغه راز دایمي اوربند باندې خبرې کېږي.
بلخوا په کابل کې هم ګډه اعلامیه خپره شوه. ولسمشر غني وویل چې سوله دوی ته لومړیتوب دی او د سولې لپاره هڅې کوي. همدا راز یې ټینګار وکړ چې د سولې خبرې به مخ ته وړي او د افغانستان ملي ګټې ورته سرې کرښې دي. د امریکا د دفاع وزیر بیا پر طالبانو غږ وکړ چې د تاوتریخوالي کموالي ته ادامه ورکړي او تر څنګ یې هوکړې ته ژمن پاتې شي. د ده په خبره، که طالبانو هوکړه ماته کړه، دوی به یې پر وړاندې اقدام وکړي.
