سهیل شاهین: زموږ او امریکا ترمنځ هېڅ راز پټ سند نه دی لاسلیک شوی

د طالبانو د قطر دفتر ویاند وایي چې ددوی او امریکا ترمنځ هېڅ راز پټ تړون نشته دی. سهیل شاهین ویلي په دې وروستیو کې یو شمېر رسنیو راپور ورکړی دی چې ګواکي د طالبانو او امریکا ترمنځ پټ اسناد هم لاسلیک شوي دي چې له خلکو سره نه دي شریک شوي. شاهین وایي ددوی او امریکا ترمنځ شته هوکړه له ټولو رسنیو سره شریکه شوې ده او تر دې هاخوا بل کوم سند نشته دی. څو ورځې وړاندې د امریکا د بهرنیو چارو وزیر مایک پمپیو ویلي وو، چې ددوی او امریکا ترمنځ هوکړه کې دوه محرم اسناد هم شامل دي چې یوازې د کانګریس غړو ته به ښودل کېږي. شاهین بیا دغه خبرې ردوي او په خبره یې د سولې هوکړې عملي کولو ته ژمن دي او ګام پر ګام مخ ته ځي څو تاوتریخوالی کم کړي.