د امریکا او طالبانو تر منځ د سولې هوکړې تر لاسلیک وروسته، په دې برخه کې ډېر نړیوال غبرګونونه پارېدلي دي. وروستی هغه یې د امریکا او روسیې ګډه اعلامیه ده چې په رسنیو کې یې تاوده بحثونه پيل کړي. روسیې او امریکا د افغانستان پر راتلونکي حکومت او د سولې پر نورو اقداماتو بحثونه کړي دي. دغه راز د امریکا ولسمشر ډونالډ ټرمپ خبرداری ورکړی چې ښايي د دوی د سرتېرو تر وتلو وروسته، طالبان په افغانستان کې واک ته ورسېږي. روسیې بیا ویلي چې دوی کولی شي د ترهګرۍ ضد مبارزې لپاره افغانستان ته خپل سرتېري ولېږي. افغان حکومت پر دې مواردو غبرګون نه دی ښودلی؛ خو ولسمشر غني وايي چې دوی په تمامه مانا له اوسني حکومت او اساسي قانون څخه دفاع کوي.
د امریکا ولسمشر ډونالډ ټرمپ په سپینه ماڼۍ کې خبریالانو ته ویلي چې د دوی تر وتلو وروسته، ښايي طالبان بېرته راوګرځي او حکومت جوړ کړي. ټرمپ وايي، د دې خطر شته چې د امریکایي عسکرو تر وتلو وروسته افغان حکومت کمزوری شي او طالبان وکړی شي چې د حکومت واګې واخلي. د ده په خبره، هر څه چې پېښېږي امریکایي عسکر شل کاله نور په افغانستان کې نه شي پاتې کېدلی او د دې وخت دی چې ټول بېرته خپلو کورونو ته راستانه شي. ټرمپ ویلي: «هېوادونه دې نور خپل امنیت پخپله تامین کړي. زموږ عسکر خو شل کاله نور هم هلته نه شي پاتې کېدلی.»
بلخوا د امریکا د بهرنیو چارو وزارت وایي چې له روسیې سره یې د طالبانو او امریکا د سولې پر هوکړه ګډه اعلامیه خپره کړې ده. په دې اعلامیه کې دواړو لورو ټینګار کړی چې د اسلامي امارت د بېرته جوړېدو مخالف دي. په اعلامیه کې راځي چې امریکا او روسیه دواړه د اسلامي امارت د جوړېدو مخالف دي؛ خو په افغانستان کې د نوي اسلامي حکومت له جوړېدو سره همغږي دي. دوی همدار راز ویلي چې له نوي حکومت سره به همکاري کوي او ملاتړ به یې کوي. د دې تر څنګ یې دا هم ویلي چې که نوی حکومت وغواړي، روسیه تیاره ده چې په بېلو ان نظامي برخو کې هم همکاري ورسره وکړي.
په اعلامیه کې دغه راز پر طالبانو او افغان حکومت غږ شوی چې تاوتریخوالی کم کړي، دایمي اوربند ته سره ورسېږي او د سولې راتلونکې ګامونه اوچت کړي. د سرچینې په خبره، طالبانو او افغان حکومت ته پکار ده چې خپل نرمښت وښيي، د زندانیانو د تبادلې پروسه پيل کړي او دغه راز د بین الافغاني خبرو د پیل لپاره ژر تر ژره اقدامات وکړي.
له دې سره جوخت د افغانستان لپاره د روسیې د ولسمشر ځانګړي استازي ضمیر کابلوف ویلي چې دوی افغانستان ته خپل سرتېري لېږلی شي. د کابلوف په خبره، دوی په لومړي سر کې دې ته په تمه دي چې په افغانستان کې د سولې بین الافغاني خبرې پایلې ته ورسېږي او تر هغه وروسته د اړتیا په صورت کې روسیه تیاره ده چې افغانستان ته د ترهګرۍ ضد مبارزې لپاره خپل سرتېري واستوي. د هغه په خبره، په افغانستان کې نوی جوړېدونکی حکومت به د روسیې له ملاتړه برخمن وي او مسکو هر ډول همکاریو ته تیار دی. کابلوف په نظامي برخه کې هم د همکاریو او مرستو خبر ورکړی دی او په خبره یې، دوی تیار دي چې د افغانستان په پرمختګ او امنیت کې د پام وړ ګامونه اوچت کړي.
افغان حکومت د یادو دریو مواردو په اړه تر دې دمه غبرګون نه دی ښودلی، خو ولسمشر غني تېره ورځ د مشرانو جرګې د تقنیني دورې د پرانیستې مراسمو ته د خبرو پر مهال وویل چې دی د افغانستان له اساسي قانون او جمهوریت د دفاع او ساتنې مسوول دی. ولسمشر وویل هغه سوله ورته د منلو نه ده چې د افغانستان ملي ګټې زیانمنې کړي او یا دلته د کلونو لاس ته راوړنې ضایع کړي. نوموړي وویل، امنیتي ادارې او افغان حکومت اوس تر بل هر وخت پیاوړي شوي دي او د دې وړتیا لري چې له خپلې خاورې دفاع وکړي. هغه ټینګار وکړ چې د سولې ملاتړی دی او د سولې لپاره د تدبیر لرل په دې مانا نه دي چې دی د سولې مخالفت کوي.
