په سختو امنیتي تدابیرو کې په کابل کې د لوړې دوه مراسم تر سره شول. ولسمشر غني په ارګ کې، خو اجرایه رییس ډاکټر عبدالله عبدالله بیا په سپېدار ماڼۍ کې د لوړې مراسم تر سره کړل. د ولسمشر غني د لوړې مراسمو ته بهرني ډيپلوماتان او سلګونه عام افغانان ورغلي وو. نوموړي په خپله وینا کې ژمنه وکړه چې د سولې لپاره به هڅه کوي او د ټولو افغانانو له ګډون به یو پیاوړی او شفاف حکومت جوړوي. بلخوا ډاکټر عبدالله عبدالله بیا ځان بریالی اعلان کړ او د لوړې مراسم یې تر سره کړل. عبدالله وویل چې د سیاسي کړکېچ د حل لپاره خبرې غوره لار بولي.
سره له دې چې د افغانستان ولسمشریزې ټاکنې له لسګونو ستونزو ډکې وې، خو په پای کې د ټاکنو خپلواک کمېسیون ولسمشر غني د ټاکنو ګټونکی اعلان کړ او نوموړي ته یې باورلیک ورکړ. بلخوا اجرایه رییس ډاکټر عبدالله عبدالله بیا ادعا کوي چې په رایو کې پراخه درغلي شوې ده او که شفافې رایې حساب شي، نو دی د افغانستان د ولسمشریزو ټاکنو ګټونکی دی. په همدې توګه ټاکل شوې وه چې څو ورځې وړاندې د لوړې مراسم تر سره شي، خو د سولې مسئلې او د امریکا- طالبانو تر منځ د هوکړې لاسلیک مراسم ځنډولي وو. تېره ورځ په ارګ او سپېدار ماڼۍ دواړو کې د لوړې مراسم جوړ شوي وو.
د ولسمشر غني او ډاکټر عبدالله تر منځ د لوړې تر مراسمو مخکې، ډېرې هڅې وشوې چې یو مراسم تر سره شي او د دواړو لورو تر منځ جوړجاړی وشي. خو د ولسمشر غني نږدې کسان وایي چې د ډاکټر عبدالله د ډلې غوښتنې غیر قانوني او د نه منلو وړ وې؛ نو ځکه جوړجاړی رامنځ ته نه شو. له همدې امله د لوړې مراسم د تېرې ورځې تر ماسپښین پورې ځنډول شوي وو، خو بالاخره دواړو لورو تحلیف وکړ.
ولسمشر غني ته قاضی القضات، خو ډاکټر عبدالله عبدالله ته د هغه د ټاکنیزې ډلې یوه غړي مولوي شاهزاده شاهد لوړه ورکړه. ولسمشر غني تر لوړې وروسته په خپله وینا کې وویل چې په افغانستان کې به یو ملي او د ټولو خلکو د منلو وړ حکومت جوړوي. د ده په خبره، په دې حکومت کې به یوازې د دولت جوړوونکي ټیم غړي نه وي؛ بلکې هر افغان به ځان په حکومت کې وویني. د ولسمشر غني د خبرو ډېره برخه د راتلونکي حکومت پر جوړښت او سوله باندې راڅرخېده. ده وویل چې د سولې ملاتړی دی او د راتلونکي حکومت تر ټولو ستره موخه به یې د سولې تامین وي. ولسمشر غني د طالب زندانیانو د خلاصون په اړه هم وویل چې ډاډ رامنځ ته شوی دی او په دې اړه به واضح فرمان صادر کړي. غني وویل: «باید ډاډ رامنځ ته شي چې دا به زموږ د خلکو امنیت ته ګواښ نه جوړوي، بلکې د سولې او امنیت په تامین کې به ګټور تمامېږي.»
بلخوا ملګرو ملتونو او د پاکستان لومړي وزیر په تازه ټویټري پیغامونو کې ولسمشر غني ته د ولسمشر په توګه مبارکي ویلې ده او هیله یې څرګنده کړې چې دی په خپلو چارو کې بریالی وي.
اجرایه رییس هم ځان د ټاکنو ګټونکی بولي او پرون یې دواړه مرستیالان خپلو دفترونو ته لېږلي دي او اجرایه رییس یې هم معرفي کړی دی. هغه د ځان لپاره د لوړې په جوړو کړو مراسمو کې د خبرو پر مهال وویل چې دی د خبرو له لارې د ستونزو د حل پلوی دی. د هغه په خبره، دی اوس هم دې ته تیار دی چې خبرې وکړي، خو په خبره یې، مقابله ډله یې خبرې ردوي.
ده وویل چې ګډ حکومت یې اعلان کړی دی او ټول به پکې شریکان وي. عبدالله عبدالله له نړیوالې ټولنې او نورو مرستندویو ډلو هم مننه وکړه چې د افغانستان د ټاکنو مالي ملاتړ یې کړی دی، خو له دوی یې هیله کړې ده چې له سیاسي کشمکشونو دې لرې اوسي.
