د ګوانتنامو له زندانه خوشي شوي پنځه طالب چارواکي د سولې د خبرو لپاره قطر ته رسېدلي دي.
اسوشېټېډ پرېس خبري اژانس د طالبانو د وياند ذبيح الله مجاهد له قوله ويلي چې د امريکايي پوځي بوبرېګډال په بدل کې له ګوانتنامو زندانه خوشي شوي پنځه طالب بنديان د سولې د خبرو اترو لپاره قطر ته رسېدلي دي.
سرچينې وايي چې محمد فضل اخوند، ملا نورالله نوري، ملا خیرالله خیرخواه، ملا عبدالحق وثیق او مولوي محمد نبي عمري هغه طالبان دي چې تازه د دې ډلې د قطر له دفتر سره یو ځای شوي دي.
د طالبانو دغه پنځه مهم غړي په ۲۰۱۵ مېلادي کال کې له طالبانو سره د اسیر شوي امریکايي سرتېري بوبرېګډال په بدل کې خوشي شوي وو.
طالبان په داسې حال کې د سولې د خبرو د پر مخ بېولو لپاره د قطر دفتر ته د پنځو تنو نورو د لېږلو خبره کوي چې د افغان سولې په پروسه کې د امريکا ځانګړي استازي زلمي خلیلزاد څو ورځې مخکې په قطر کې د یادې ډلې له یو شمېر غړو سره وکتل.
خلیلزاد د طالبانو پر استازو سربېره، د افغانستان، سعودي عربستان، متحده عربي اماراتو، قطر او پاکستان له چارواکو سره هم کتلي دي.
له پاکستاني چارواکو سره د خلیلزاد د لیدنو کتنو په ترڅ کې د طالبانو د رهبرۍ شورا غړی عبدالغني برادر چې کلونه یې د پاکستان په زندان کې تېر کړي وو، څو ورځې مخکې خوشي شو.
د سولې عالي شورا د دې ټولو هڅو ملاتړ کوي، خو وياند يې له ازادي راډيو سره په مرکه کې د قطر دفتر ته د نويو طالب چارواکو د رسېدو په غبرګون کې په احتياط سره خوله خلاصه کړې ده.
د سولې د عالي شورا وياند سيداحسان طاهري وایي: «بې له شکه چې د سولې پروسه د افغانانو په مشرۍ او مالکیت ترسره کېږي او د نړۍ او سیمې هېوادونه په دې برخه کې تخنیکي همکاري کوي، هر اقدام چې د افغان حکومت او طالبانو ترمنځ د سولې د خبرو د زمینې برابرولو په برخه کې اخیستل کېږي، مونږ ورنه ملاتړ کوو او د افغانستان په خیر یې ګڼو.»
په ورته وخت کې د ولسي جرګې د نړیوالو اړیکو د کمېسیون غړی داوود کلکاني وايي چې له خبرو مخکې د طالبانو یو شمېر شرطونه منل شوي او تازه د قطر دفتر ته د طالبانو د پنځو تنو نورو غړو رسېدو، د سولې د خبرو پيلېدو ته هیلې ډېرې کړې دي.
کلکاني وايي: «طالبانو چې کوم شرطونه د سولې د خبرو لپاره وړاندې کول، لیدل کېږي چې د امکان تر بریده منل شوي، هغوی له امریکا سره خبرې کوي، هغه فشارونه چې پر پاکستان راغلي، د دې لامل ګرځېدلي چې طالبان خبرو ته چمتو شي او هیلې شته چې یوې حللارې ته غاړه کېږدي.»
دا په داسې حال کې ده چې ټاکل شوې تر راتلونکو څو ورځو پورې په مسکو کې هم د افغانستان د سولې په تړاو غونډه جوړه شي.
د افغانستان د بهرنیو چارو وزارت ویلي چې د سولې لپاره تر بل هر وخت هڅې چټکې شوې او له روسي چارواکو سره د مسکو د غونډې په تړاو خبرې روانې دي.
روسي چارواکو مخکې تر دې ویلي وو چې د مسکو ناستې ته افغانستان، امریکا، طالبان او د سیمې یو شمېر مهم هېوادونه هم وربلل شوي دي.
