د کتاب لیکوال وايي: په ۲۰۰۶ میلادي کال کې د کتاب نړیوالې ورځې د مراسمو پر مهال له ما څخه وغوښتل شول، څو د (مه وېرېږئ، پیل یې کړئ) کتاب ولیکم. موخه دا وه چې د لوستونکو لپاره ګټور او الهام بښونکي مطالب ولیکم، څو هغوی د لا ډېرو کتابونو لوستلو ته وهڅول شي.
د دغه کتاب لومړنی چاپ زما د تمې خلاف په زیاته کچه وپلورل شو او د نړۍ په ګوټ ګوټ کې د خلکو له تاوده هرکلي سره مخ شو. دغه کتاب په سوېلي افریقا کې د ډېر پلورل شوي کتاب لقب تر لاسه کړ او همدارنګه په اسټرالیا کې د غوره کتابونو په ډله کې راغی. د مینه والو لخوا د دغه کتاب د زیاتې ستاینې او خوښولو له کبله له ډېرې خوشالۍ څخه په جامو کې نه ځایېدم. ډېرو کسانو لیکونه راته واستول او ویل به یې چې دا کتاب د هغوی لپاره یو ښه لارښود او الهام بښونکی و. له دې سره مې دې ته هم پام شو چې کتاب یوازې د نویو لوستونکو د پام وړ نه، بلکې د پخوانیو مینه والو او کتاب لوستونکو د خوښې وړ هم ګرځېدلی دی.
یو کال وروسته له ما وغوښتل شول څو د کتاب دویم چاپ هم خپور کړم او په مطالبو کې یې زیاتونه وکړم څو په زیاته کچه خلک ترې برخمن شي. د کتاب په دویم چاپ کې د ژوند ټول لومړني درسونه او ډېر هغه مطالب چې راتلونکي ته یې کتنه درلوده، خپاره شول.
د کتاب د لیکلو پر مهال مې له تمې او ارادې پرته ډېر اړین درسونه او موضوعات زده کړل. د درسونو زده کړه هغه وخت پیل شوه کله چې ماشوم وم. زده کړې مې په ښوونځي کې پیل شوې، خو دوام یې د سوداګرۍ په برخه کې و. زه لا هم د زده کړو په حال کې یم او هېڅکله به د درس او زده کړې دوام ته د پای ټکی کې نږدم. دغو درسونو د ژوند په ټوله موده کې له ماسره مرسته کړې ده او هیلهمن یم چې تاسو هم د دې کتاب په لوستلو سره داسې مطالب تر لاسه کړی، چې ستاسو لپاره الهام بښونکي او ګټور وي.
په دې کې شک نشته چې موږ غواړو د نورو سوداګرو او شرکتونو خلاف خپل کارونه په منظم ډول او په پاک نیت سره سرته ورسوو او دا هغه څه دي چې تل زما لپاره ګټور او اغېزناک تمام شوي دي. زه یو زیارکښه انسان یم، خو په زیاته کچه تفرېح او لوبې هم کوم. زه د موخې په درلودلو باور لرم. د هیلو درلودل هېڅکله ناسمه ځانګړتیا نه ده، خو زه تل د عملي هیلو او غوښتنو په اړه فکر کوم. زه د هغه څه په اړه چې ناشوني دي، فکر نه کوم. زه د ځان لپاره موخې ټاکم او وروسته یې د لاس ته راوړو لپاره لارې لټوم. کله چې د یوه کار د تر سره کولو هوډ کوم، په سمه توګه یې پای ته رسوم. په کارونو کې مې هېڅکله شک او دوه زړيتوب نه کوم. په ښوونځي کې لیکل او لوستل راته سخت وو. هغه مهال مې د لوستلو په برخه کې د ستونزې لامل لا نه و مشخص شوی، په همدې اساس به ښوونکو فکر کاوه چې زه ټنبل یم. همدا علت و چې تل به مې مطالب په یادو یادول. اوسمهال ښه حافظه لرم او د یوې ښې وسیلې په توګه ترې ګټه اخلم.
له کومه وخته مې چې د «ویرجېن» ټولنه رامنځ ته کړې، یانې له ۱۹۶۷ کال را پدېخوا مې ډېر کارونه تر سره کړي دي. موږ یو کوچنی شرکت و چې په تدریجي ډول سره رالوی شوو. زموږ وده او پرمختګ په ډېرو برخو کې لکه د څښاک تولید، د ناویو جامې، موبایل ټلیفونونه، کتابونه، مجلې، د کارتوني او ګرافیکي فلمونو تولید، الوتکې، هوایي شرکت، د ګاډي پټلۍ او ان تر فضایي سفرونو پورې؛ دا هر څه دومره لوی او سخت نه دي چې لاسرسی ورته ناشونی وي. زه له دې امله چې زموږ ټیم په پوره مینه خپل کارونه تر سره کوي، پر ځان ویاړم. د دې هرڅه په اړه مې اغېزمنې لارې چارې درسره په همدې کتاب کې شریکې کړې دي.
مینه وال کولای شي یاد کتاب پر اکسوس سربېره، د ښار له نورو لویو کتابپلورنځیو هم په مناسب قېمت تر لاسه کړي.
