ولسمشر غني:  له هوايي دهليزونو وروسته اوس پر ځمکنيو دهليزونو کار کوو

افغان ولسمشر تېره ورځ د هوایي دهلیزونو له لارې له صادروونکو سره د خبرو پر مهال ویلي، چې هوايي دهلیزونه د ځان بسیاینې لپاره تر ټولو مهم ګام دی او په همدې دوام به پر ځمکنیو دهلیزونو هم پراخ کار کېږي. ولسمشر غني په ارګ کې د ګاونډیو هېوادونو له سفیرانو، سوداګرو او ديپلوماتانو سره د خبرو پر مهال ویلي، افغان حکومت هڅه کوي چې د بهرنیانو پر مرستو اتکا راکمه کړي نو له همدې امله غواړي په بهر کې د افغان توکو لپاره بازارموندنه وکړي. ولسمشر د ټولو هغو هېوادونو له همکارۍ مننه وکړه چې افغان سوداګر د هوايي دهلیزونو له لارې راکړه ورکړه ورسره کوي. دمګړی افغانستان له چین، هند، ترکیې، سعودي عربستان او اروپا سره د هوايي دهلیزونو له لارې نښلول شوی دی. سره له دې چې د الوتکو له لارې صادرات او واردات تر ټولو ګرانبیه سوداګري ده، خو افغان حکومت دغه کار یوه لاس ته راوړنه بولي او په خبره یې افغان سوداګرو له دې درکه ۱۲۰ میلیونه ډالر ګټه کړې ده.