په مسکو کې د افغان سولې په اړه ناستې د ملي یووالي حکومت د چارواکو غبرګونونه هم پارولي دي. تازه د ملي یووالي د حکومت اجرایه رییس ډاکټر عبدالله عبدالله ویلي، چې د افغانستان د سولې په اړه هر ډول جوړېدونکې غونډې باید د افغان حکومت پر محوریت وي. عبدالله عبدالله تېره ورځ د رسنیو له مسوولانو سره د خبرو پر مهال د افغان سولې په اړه د پيل شوو هلوځلو په اړه خبرې وکړې. هغه وویل، افغان حکومت د سولې لپاره له ټولو هغو هڅو ملاتړ کوي چې د افغان حکومت پر محوریت جوړېږي او مشري یې افغانان وکړي.
نوموړي د مسکو ناستې ته په اشارې وویل، که د افغانستان سیاسي مشران په دې ناسته کې د حکومت او طالبانو ترمنځ مخامخ خبرو ته زمینه برابره کړي، دا به د سولې پرمختګ لپاره مناسب اقدام وي. هغه ویلي، د سولې هڅې باید د افغانانو ګټې او عزت خوندي کړي او هیله یې څرګنده کړې چې دغه غونډه هم د بین الافغاني مذاکراتو زمینه برابره کړي.
عبدالله عبدالله د امریکايي ځواکونو د وتلو په اړه هم وویل، چې امریکايي ځواکونه به بالاخره له افغانستان وځي. د ده په خبره د امریکا او افغانستان ترمنځ هېڅ داسې سند نشته چې له مخې به یې امریکایي ځواکونه د اوږدمهال لپاره په افغانستان کې پاتې شي او یا دغه ځواکونو ته دایمي اډې ورکړل شي. د ده په وینا: «امریکايي ځواکونه بالاخره وځي. هېڅ داسې سند نشته چې موږ ووایو دغه ځواکونه د تل لپاره په افغانستان کې پاتې کېږي. دوی د ترهګرو تر فعالیت پورې دلته دي او د دایمي حضور یا دایمي اډو کوم سند موږ نه دی ورسره لاسلیک کړی.»
نوموړي همدا راز په دغه خبرو کې وویل، چې افغان ځواکونه د ترهګرۍ د تهدیداتو پر وړاندې د مبارزې وړتیا لري او که بهرني ځواکونه وځي، نو افغان پوځیان د دې وړتیا لري چې له خپل هېواد دفاع وکړي. د عبدالله عبدالله په خبره: «که امریکايي ځواکونه وځي، نو دنیا خو پای ته نه ده رسېدلې، موږ خپل پوځ لرو، پر دوی تکیه کوو، دوی کولی شي له خپلې خاورې دفاع وکړي».
عبدالله عبدالله د خپلو خبرو پر دوام وویل، چې د افغان سولې په اړه سیمه ییزه اجماع پیاوړې شوې ده او همدا چې د افغانانو ترمنځ د خبرو زمینه برابره شي او د سولې خبرې یوې پایلې ته ورسېږي، ټول اړخونه به قربانیو ته تیار شي. د ده په خبره د سولې راتګ د بېړې کار نه دی او پراخې حوصلې ته اړتیا لري.
عبدالله عبدالله داسې مهال د سولې او مسکو د غونډې په اړه خبرې کړې، چې ټاکل شوې دا غونډه نن د روسیې په پلازمېنه کې د افغان سیاسیونو په ګډون جوړه شي. طالبان په یوه خپره کړې اعلامیه کې ویلي وو، چې د افغان حکومت له استازو پرته نور د افغانستان له ټولو لورو سره د مسکو په غونډه کې خبرې کوي. دوی د شیرعباس ستانکزي په مشرۍ د یوه لسیز کسیز پلاوي د لېږلو خبره هم کړې ده. په دغه غونډه کې د افغانستان مطرحو سیاسي څېرو برخه اخیستې ده. دوی تېره ورځ په یوه ګډه اعلامیه کې ویلي وو، چې د افغانانو په مشرۍ او مالکیت د سولې خبرو زمینې برابرولو ته دا لومړنی ګام دی. د دوی په خبره، د افغانستان د اوسني نظام تقویت یې د بحث اصلي محور دی او موخه یې دا ده چې ښکېل لوري بین الافغاني خبرو ته وهڅوي.
