عامې روغتیا وزارت:  افغانستان د نفوس تر ټولو چټکه وده لري

د عامې روغتیا وزارت وایي ددوی د معلوماتو له مخې په افغانستان کې د نفوس د ډېرېدو چټکوالی به د هېواد راتلونکو نسلونو ته ستونزې جوړې کړي. ددغه وزارت وزیر فیروز الدین فیروز وایي دمګړی په افغانستان کې د نفوس د ډېرېدو کچه په کلنۍ توګه ۲.۳ سلنه ده چې که همداسې دوام وکړي تر۲۴ کلونو پورې به د افغانستان نفوس دوه برابره شي. د نوموړي په وینا اوس په افغانستان کې په اوسط ډول هره جوړه له ۴ تر شپږو اولادونه زېږوي، خو د عامې روغتیا وزارت هڅه کوي د نفوس د تنظیم چارې په کورنیو کې عامې کړی. دده په خبره په افغانستان کې د نفوس چټکه وده د تعلیم، روغتیايي خدماتو، اقتصاد او نورو مسایلو لاسرسی ستونزمنوي، نو په افغانستان کې روان وضعیت ته په کتو داسې ویلی شو، چې د نفوس چټکه وده د راتلونکو نسلونو لپاره نوي مشکلات زېږولی شي.