حامد کرزي په هلمند او کونړ کې هوایي بریدونه غندلي دي

د هېواد پخواني ولسمشر حامد کرزي د هلمند په سنګین او د کونړ په مروره ولسوالۍ کې د بهرنیو ځواکونو پر هوایي عملیاتو چې له امله یې ملکیانو ته مرګ ژوبله واوښته خپله ژوره خواشیني څرګنده کړې او په کلکو ټکو یې غندلي دي. د کرزي له مطبوعاتي دفتره په خپرې شوې اعلامیه کې راغلي، حامد کرزی دغه راز ظالمانه اعمال چې له یوې خوا هېوادوالو ته ځاني او مالي زیان اړوي او له بلې خوا د سولې له روانو مذاکراتو سره په تضاد او مخالفت کې دي په کلکه غندي او زیاتوي، پرته له مذاکرې او تفاهم څخه سولې ته د رسېدو بله لار نه شته او له همدې امله له امریکا غواړي چې په افغانستان کې خپل نظامي عملیات ودروي او د خلکو د کورونو د بمباري پر ځای د سولې د خبرو اترو لپاره لا زیاته هڅه او هر اړخیزه همکاري وکړي. دا په داسې حال کې ده چې پرون په کونړ کې د بهرنیو او وړمه ورځ هلمند کې د ګډو ځواکونو په عملیاتو کې ګڼو ملکي وګړو ته مرګ ژوبله واوښته چې یو ځل بیا یې د افغانانو توند غبرګونونه را وپارول.