اتمر په کابل کې د اروپایي ټولنې له سفیرانو سره لیدلي

د هېواد د ملي امنیت پخواني سلاکار او راتلونکو ټاکنو ته نوماند محمد حنیف اتمر نن په افغانستان کې د اروپایي ټولنې له سفیرانو سره لیدلي دي. د سولې او اعتدال ټیم له دفتره په خپرې شوې خبرپاڼه کې راغلي، په دغه کتنه کې دواړو لوریو، د مسکو بین ‌الافغاني ناستې د محتویاتو، سولې بهیر او د راتلونکو ټاکنو په اړه بحث او خبرې کړې دي. اتمر ویلي، له نړیوالې ټولنې او نړیوالو شریکانو غواړي چې د سولې پروسې په بریالیتوب کې له افغانانو سره همکاري وکړي. اتمر دغه راز زیاته کړې، د انتخاباتي نظام د اصلاح له‌ پاره چې د ولسمشرۍ ریاست نوماندانو کومه طرحه ارګ ته لېږلې، ولسمشر باید هغه په پام کې ونیسي. سرچینه کاږي د دغې کتنې په پای کې د سولې او اعتدال ټاکنیز ټیم مشر حنیف اتمر، د اروپایي ټولنې له سفیرانو وغوښتل چې په افغانستان کې دې د رڼو او عادلانه ټاکنو د ترسره کېدو په موخه نړیواله ټولنه د ټاکنو پر بهير د څارنې ميکانيزم پیاوړی کړي.