د ټاکنیزو کمیسیونونو غړي وايي، ددوی په اړه د حکومت وروستۍ پرېکړه د قانون خلاف او سیاسي ده. د ټاکنیزو شکایتونو او ټاکنو خپلواک کمیسیون غړو په یوه ګډه اعلامیه کې د حکومت وروستۍ پرېکړه غیر قانوني بللې ده. په ګډه اعلامیه کې راغلي چې د قانون له مخې مقننه قوه او حکومت د خپلې کاري دورې په وروستي کال کې د ټاکنو په قانون کې تعدیل نه شي راوستلی او همدا راز د ټاکنیزو کمیسیونونو کمیشنران او غړي له دندې نه شي ګوښه کولی. د سرچینې په خبره حکومت د قانون خلاف د ټاکنو قانون تعدیل کړی دی او ددواړو کمیسیونونو غړي یې له دندو عزل کړي دي. د یادو کمیسیونونو غړو ویلي چې د حکومت دغه پرېکړه غیر قانوني او سیاسي ده او ملت یې باید پر وړاندې ودرېږي. دوی ادعا کوي چې حکومت غواړي ټاکنې مهندسي کړي، نو د اوسنیو غړو په موجودیت کې دوی دا کار نه شوای کولی، ځکه یې پرېکړه کړې چې د کمیسیونونو غړي له دندو ګوښه کړي. د کمیسیونونو غړو، پر څارونکو بنسټونو، حقوقي جریانونو او نوماندانو غږ کړی، چې د حکومت ددغه غیر قانوني اقدام پر وړاندې ودرېږي او د ملت له قانوني حقوقو دفاع وکړي. ولسمشر تېره ورځ د ټاکنو قانون تعدیل شوې بڼه تصویب کړه او بیا یې د یوه فرمان له مخې د ټاکنیزو کمیسیونونو غړي له دندو عزل کړل. لویې څارنوالۍ بیا سم د واره د کمیسیونونو غړي له هېواد ممنوع الخروج اعلان کړل او وایي ددوی دوسیې تر څېړنې لاندې دي.
