ارګ په ټاکنو کې؛ د دولتي کارکوونکو د مسوولیتونو په اړه دوه فرمانونه صادر کړي

ارګ د رڼو ټاکنو د ترسره کېدو په موخه د دولتي چارواکو او کارکوونکو د مداخلو او مسوولیتونو په اړه دوه فرمانونه صادر کړي دي او له ټولو دولتي ادارو یې غوښتنه کړې چې د رڼو ټاکنو د ترسره کېدو په موخه دې په ټاکنیزو چارو کې مداخله نه کوي. فرمان کې راغلي، دولتي کارکوونکي مکلف دي چې له اړوندو ارګانونو سره د بې طرفي په پام کې نیولو سره لازمه مرسته او همکاري وکړي. فرمان کې دغه راز راغلي، هیڅ څوک حق نه لري د ټاکنو کمیسیون ته د کارکوونکو په توګه فرمایشي کسان ولېږي. په ورته وخت کې د یو بل فرمان له مخې، ولسمشر دفاع او کورنیو چارو وزارت ته هم لارښوونه کړې چې د ټاکنو د امنیت ساتلو لپاره دې لازم تدابیر ونیسي. فرمان زیاتوي، ټولو امنیتي ځواکونو ته دې هدایت ورکړل شي چې د ټاکنیزو مرکزونو له امنیت ساتلو پرته دې په ټاکنیزو چارو کې مداخله او له کوم نومانده ملاتړ نه کوي او د رایي ورکوونکو ټولو حقونو ته په پام باید د هغوی له حقونو دفاع وکړي او له هر راز توپیرونو پرته خپله دنده په صادقانه ډول سر ته ورسوي. د دواړو فرمانونو په وروستۍ برخه کې لیکل شوي چې که چېرته څوک له دغو اصولو نه سرغړونه وکړي نو قانوني چلند به ورسره وشي.