د ایران او روسیې تازه ادعا: افغانستان کې د جاسوسۍ لپاره اسراييليان ځای پر ځای شوي

ایران ادعا کوي چې په افغانستان کې اسراييلي عسکر موجود دي او له دې ځایه ایران څاري. ایراني رسنیو په خپلو راپورونو کې د ایراني چارواکو له خولې ویلي، چې اسراييلي عسکر په هرات ولایت کې په امریکايي اډو کې ځای پر ځای شوي دي او له دې ځایه ایران څاري او په جاسوسۍ پسې راغلي دي. ایراني رسنۍ وايي چې دغه عسکر د شینډنډ په یوه نظامي اډه کې ځای پر ځای شوي دي. روسي رسنۍ هم ادعا کوي چې د امریکايي عسکرو تر بیرغ لاندې اسراييلي سرتېري په افغانستان کې ځای پر ځای شوي دي او په سیمه کې جاسوسي کوي. اسراييلو تر دې دمه د ایران او روسیې ددغه ادعا په اړه څه نه دي ویلي. افغان حکومت هم تر اوسه په دې اړه غبرګون نه دی ښودلی چې په رښتیا هم اسراييلي عسکر په افغانستان کې شته دي او کنه. ایران تر دې وړاندې هم داسې ادعاوې کړې وې، چې ګواکي ځينې بهرني هېوادونو له افغان خاورې ایرانی حکومت څاري او جاسوسي یې کوي.