د ناټو عمومي منشي: د سولې خبرې باید د افغانانو په مشرۍ او مالکیت ترسره شي

د ناټو عمومي منشي ینس سټولټنبرګ د مونیخ امنیتي کنفرانس په څنډه کې له ولسمشر غني سره کتلي دي. دواړو لورو په دې لیدنه کې په افغانستان کې پر روان امنیتي وضعیت، د ترهګرۍ پر وړاندې پر مبارزې، د افغان پوځیانو پر روزنې، سولې او راتلونکي مشورتي لویې جرګې خبرې کړې دي. سټولټنبرګ ویلي ناټو د افغانستان د ثبات لپاره د خلکو تر څنګ ولاړه ده او دغه هېواد ته د امنیت او سولې تر راتګ پورې به د ترهګرۍ پر وړاندې مبارزه روانه وي. سټولټنبرګ له ولسمشر غني سره د ترهګرۍ پر ضد د مبارزې او د ترهګرو د ملاتړ هېوادونو په اړه هم خبرې کړې دي. هغه ویلي، چې ناټو د ترهګرۍ ضد مبارزه کې د افغان پوځ تر څنګ ولاړه ده او د سولې په برخه کې د اخیستل کېدونکي هر ګام ملاتړ هم کوي. دده په وینا دوی د سولې هغه خبرې مني او درناوی ورته لري، چې په هغه کې افغانان حضور ولري او د افغانانو په مشرۍ او مالکیت ترسره شي.