افغان سوله باید د سیمې د قدرتونو ترمنځ د رقابت وسیله نه شي. پخواني ولسمشر حامد کرزي له اسوشټېډپرېس خبري اژانس سره په خپله نوې مرکه کې ویلي، چې افغانان سولې ته لېواله دي، خو هېچا ته به اجازه ور نه کړي چې د خلکو پر دې ستره هيله معامله وکړي. د ده په خبره، ځينې هېوادونه هڅه کوي چې د افغان سولې په نامه امتیاز واخلي او همدا راز داسې هڅې روانې دې چې د سولې پر سر رقابتونه رامنځ ته شي، خو دا کار د هېچا په ګټه نه دی. د ښاغلي کرزي په خبره، امریکا باید د افغانستان د سولې مسئله د سیمه ییزو قدرتونو ترمنځ د رقابت په سبب او وسیله بدله نه کړي.
ښاغلي کرزي په خپله دې مرکه کې اندېښنه څرګنده کړې، چې ښايي د سیمې قدرتونه د افغان سولې پر سر له یو بل سره سیالي وکړي او په دې توګه افغانستان د سیمه ییزو رقابتونو پر ډګر بدل شي. هغه ویلي، امریکا باید دا زمینه برابره نه کړي چې د افغانستان ګاونډیان او د سیمې قدرتونه پر سوله سره سیالي وکړي او افغانستان د دوی ترمنځ د رقابتونو پر ډګر بدل شي. کرزي زیاته کړې: ((موږ نه غواړو چې د سولې بهیر د سیمې د قدرتونو له لوري پر افغانستان د فشار په موخه یرغمل کړل شي)).
پخواني ولسمشر ویلي، امریکا باید دې ته هم متوجه وي چې د افغان سولې پر سر پاکستان ته امتیاز ور نه کړي. د نوموړي په خبره، افغانان نه غواړي شاتګ وکړي او یا د پاکستان تر اغېز لاندې وي. هغه زیاته کړې، که امریکا پاکستان ته د افغان سولې پر سر امتیاز ورکړي، نو پاکستان ارو مرو دا هڅه کوي چې پر افغان سوله خپل نفوذ ولري او افغانان هېڅکله د پاکستان نفوذ نه مني. د ښاغلي کرزي په خبره: ((موږ نه غواړو چې یو ځل بیا افغانستان د سولې د خبرو په نامه د پاکستان تر نفوذ لاندې وي. ما امریکایانو ته واضح ویلي چې په افغانستان کې د سولې او همدا راز د افغانستان پر سر له پاکستان سره معامله کول دوه بېل شیان دي. د دې دواړو مسئلو ترمنځ لوی توپير موجود دی)).
ښاغلي کرزي اسلام اباد ته د طالبانو د پلان شوي سفر په اړه هم ویلي، چې دا مسئله د افغان سولې په بهیر کې د خطر زنګ دی. دده په خبره، پاکستان ته د طالبانو بې پلانه او ناڅاپي سفر به هم د دې سبب شي چې هېواد د سیمې د قدرتونو ترمنځ د سیالیو پر ډګر بدل کړي. هغه زیاته کړې چې په افغانستان کې روانه جګړه یوازې د خبرو له لارې د حل وړ ده او دا خبرې باید د افغانانو ترمنځ وشي. پخواني ولسمشر همدا راز ویلي چې حکومت باید د سولې په برخه کې نرمښت وښيي. د کرزي په خبره، سوله د افغانانو هیله ده او که په هېواد کې روانه جګړه او خونړۍ لړۍ د سولې او سیاسي مذاکراتو پر مټ د حل وړ وي، نو باید حکومت هم پوره نرمښت وښيي. کرزي ویلي: ((نرمښت زموږ په ګټه دی. سوله د کلونو اوږده جګړه ختموي، نو حکومت ته مې مشوره دا ده چې نرمښت وښيي)).
ښاغلي کرزي داسې مهال دغه څرګندونې کړې چې ټاکل شوې وسله وال طالبان د قطر تر ناستې مخکې اسلام اباد ته سفر وکړي. د وسله والو طالبانو ویاند، ذبیح الله مجاهد رسنیو ته په یوه لېږلې اعلامیه کې ویلي وو، د روانې میلادي میاشتې په ۲۵مه په دوحه کې د طالبانو او امریکا ترمنځ مخامخ خبرې کېږي، خو تر هغه مخکې به طالب پلاوی اسلام اباد ته ځي. د معلوماتو له مخې، طالبان د پاکستاني حکومت په رسمي بلنه اسلام اباد ته ځي او هلته به له زلمي خلیلزاد سره هم خبرې کوي. دا چې په دغه لیدنه کې به پر کومو مسایلو خبرې کېږي، په اړه یې څه نه دي ویل شوي.
