د امریکا د کانګرس غړي: له افغانستان په بېړه د سرتېرو ایستل د حل لار نه ده

امریکايي قانون جوړونکي وایي له افغانستان د امریکایي ځواکونو وتل پر ځای پرېکړه نه ده. د امریکایي رسنیو د راپورونو له مخې امریکايي لوړپوړو قانون جوړوونکو په مونیخ کنفرانس کې له ولسمشر غني سره لیدلي دي. دوی ویلي د ټرمپ دا پرېکړه سمه او پر ځای نه ده، چې له مخې یې غواړي په بېړه امریکایي ځواکونه له افغانستان وباسي. ددوی په وینا ولسمشر نه شي کولی چې په عجولانه او بې پلانه توګه خپل سرتېري له افغانستان وباسي. امریکایي استازو ټینګار کړی، چې تر هر څه وړاندې دې د افغانستان له امنیت او ثبات ډاډ حاصل شي او وروسته دې د امریکایي ځواکونو د حضور او وتلو په اړه پرېکړه وشي. دوی له ولسمشر غني سره په افغانستان کې پر روان وضعیت او سوله هم خبرې کړې دي. د امریکايي استازو دغه ډلې ویلي د افغانستان د سولې له پروسې ملاتړ کوي.