د ولسي جرګې اداري پلاوی: سعودي شهزاده دې طالبان له حکومت سره خبرو ته وهڅوي

د ولسي جرګې اداري پلاوی د سعودي له ولیعهده غوښتنه کوي چې له طالبانو سره په لیدنه کې دې دغه ډله له افغان حکومت سره مخامخ خبرو ته وهڅوي. دوی وایي، افغانان تمه لري چې د سعودي عربستان ولیعهد او طالبانو ترمنځ خبرې به دې ته زمینه برابره کړي څو وسله وال طالبان له افغان حکومت سره خبرې وکړي. د یادې جرګې دویم منشي عرفان الله عرفان وویل، سعودي باید د بین الافغاني خبرو لپاره پر طالبانو له خپل نفوذه استفاده وکړي. هغه په دې برخه کې د سعودي رول مهم بللی دی او زیاته کړې یې ده چې که سعودي وغواړي کولی شي طالبان بین الافغاني خبرو ته چمتو کړي. دا په داسې حال کې ده چې معتبرو سرچینو رویټرز ته ویلي، طالبان به په اسلام اباد کې د سعودي له شهزاده محمد بن سلمان سره وګوري خو طالبانو ویلي تر اوسه یې په دې اړه کومه پرېکړه نه ده کړې.