جرمني طالبانو ته ویلي چې غواړي د افغان ستونزې لپاره د بن دویم کنفرانس جوړ کړي. وسله وال طالبان او جرمني له یو بل سره اړیکې لري او د دوی ترمنځ څو ځله د افغان جګړې د ختمولو او سولې په اړه خبرې شوې دي. وسله والو طالبانو ته نږدې سرچینې وايي چې جرمني له طالبانو سره نږدې اړیکې لري او موخه یې هم دا ده، چې د افغان جګړې په پای ته رسولو کې همکاري وکړي.
د سرچینې په خبره، جرمني څو ځله طالبانو ته وړاندیز کړی دی، چې په دغه هېواد کې دې خپل سیاسي دفتر پرانیزي او له دې ځایه دې د سولې مسایل مخ ته یوسي.
سرچینې وايي چې د جرمني فدرالي حکومت د همدغو اړیکو په دوام، د افغانستان په قضیه کې د ښکېلو خواوو د یو ځای کولو او ستونزې د حلولو په موخه، د بن د دویم کنفرانس د جوړولو وړاندیز هم کړی دی. د دغه احتمالي کنفرانس د جوړېدو لپاره المان چمتووالی ښودلی دی او په همدې اړه یې له طالب لوري سره هم خبرې کړې دي.
وسله والو طالبانو تر اوسه په دې اړه په رسمي توګه څه نه دي ویلي، خو د چارو شنونکي په دې باور دي چې طالبان د بن له لومړي کنفرانسه ښه خاطره نه لري، نو ښايي د بن دویم کنفرانس ته هم حاضر نه شي. د سیاسي مسیالو شنونکی وحید مژده وايي، طالبان به دغه کنفرانس ته تیاری ونه ښيي، ځکه د بن له لومړي کنفرانسه ښې خاطرې نه لري. خو سره له دې هم د جرمني فدرالي حکومت د بن د دویم کنفرانس لپاره خپلې هلې ځلې پيل کړې دي. دغه هېواد غواړي چې په یاد کنفرانس کې د طالبانو ټول مشران حضور ولري او په دې توګه په افغانستان کې روانې جګړې ته د حل معقوله لار پيدا کړي.
د طالبانو ترڅنګ، افغان حکومت هم تر اوسه د دغه ډول راپورونو په اړه غبرګون نه دی ښودلی. بلخوا د ملي شورا غړي بیا وايي، که د بن دویم کنفرانس جوړېږي، نو د افغانستان ټولې ستونزې باید پکې مطرح شي او د دغه کشالې اساسي او دایمي حللارې باید ولټول شي. د ولسي جرګې غړي عبدالرحیم ایوبي ویلي: «که د افغانستان د ستونزې لپاره د بن په څېر یو بل کنفرانس جوړېږي، نو دا ښه خبره ده، خو پرېکړه به زموږ په اړه بهرنیان نه کوي. ستونزې ته به د افغانانو ترمنځ د افغانانو په مشرۍ د حل لار پیدا کېږي. کنفرانس باید د دې سبب شي چې لويې جرګې او ټولو اړخونو ترمنځ خبرو ته زمینه برابره شي.»
د ولسي جرګې بل غړی عبدالقادر وطندوست بیا وایي، چې تر کنفرانس مخکې باید لویه جرګه را وبلل شي. د نوموړي په خبره، که لویې جرګې طالبانو او ښکېلو اړخونو ته دا اجازه ورکړه، چې د افغانستان د ستونزې د حل لپاره په بهرنیو هېوادونو کې سره جرګه شي، نو بیا دې د بن کنفرانس په څېر کنفرانسونه جوړ شي او له دې پرته دغه ډول اقدامات د افغانانو په ګټه نه دي. نوموړی زیاتوي: «د بن کنفرانس جوړېږي که بل هر کنفرانس جوړېږي، خو تر هر څه وړاندې باید لویه جرګه را وبلل شي. هلته که افغانانو اجازه ورکړه، چې دوی دې بل ځای کې خپله ستونزه حل کړي، نو بیا دې د بن دویم کنفرانس وشي او له دې پرته چا ته د منلو نه دی».
د جرمني له لوري د بن د دویم کنفرانس د جوړېدو راپورونه داسې مهال خپرېږي، چې ولسمشر غني د سولې د مشورتي لویې جرګې د جوړولو غوښتنه کړې ده. د غني په خبره، په راتلونکې کب میاشت کې باید د سولې مشورتي لویه جرګه جوړه شي او د افغان سولې په اړه به پرېکړه پکې کېږي. دغه اقدام ډېر خلک هیله من کړي دي، خو وايي چې لویې جرګې ته د خلکو په راوستو او انتخاب کې باید شفافیت وي او یوازې هغه کسان دې نه رابلل کېږي چې د حکومت یا بل ښکېل لوري خبرې تایید کړي، بلکې دوی باید د افغانستان ستونزې ته رښتینی او دایمي حل پیدا کړي.
