زلمی خلیلزاد: له ديپلوماتیکو لارو د امریکا او افغانستان ګټې خوندي کېدلی شي

د افغان سولې په اړه د امریکا د بهرنیو چارو وزارت ځانګړي استازي زلمي خلیلزاد تېره ورځ ناوخته له ولسمشر غني سره لیدلي دي. د ارګ له مطبوعاتی دفتره په خپره شوې خبرپاڼه کې راغلي، چې دواړو لورو د سولې په برخه کې دوروستیو پرمختګونو په اړه خبرې کړې دي. په دې لیدنه کې د امریکا ځانګړي استازي زلمي خلیلزاد ویلي، امریکا هڅه کوي له ديپلوماتیکو لارو او سیاسي مذاکراتو د کابل او واشنګټن ګټې خوندي کړي. دده په خبره له سیاسي او ديپلوماتیکو لارو د افغانستان او امریکا ګټې د خوندي کېدو وړ دي او امریکا په دې برخه کې خپلې هڅې ډېرې کړې دي. هغه همدا راز ویلي چې د افغانانو په مشرۍ او مالکیت د سولې خبرو لپاره زمینه برابروي. ولسمشر غني هم په دې لیدنه کې ویلي چې افغانان د سولې تږي دي خو دغه سوله باید د افغان ملت او افغان حکومت عزت خوندي کړي او د کلونو لاس ته راوړنې وساتي.