سیاسي ګوندونو او دیني علماوو پرون په یوه غونډه کې پر بین الافغاني مذاکراتو ټینګار وکړ، خو ترڅنګ یې له حکومته وغوښتل چې قربانۍ ته دې تیاری او نرمښت وښيي. پرون له افغانستان څخه د پخواني شوروي اتحاد لښکرو د وتلو په مناسبت جوړې شوې غونډې ته د حرکت انقلاب اسلامي ګوند مسوولانو او د غونډې ګډونوالو ویلي، چې جګړې له افغانانو ډېرې قربانۍ اخیستې دي او اوس د دې وخت دی، چې د سولې لپاره هر ډول قربانۍ ته چمتووالی وښودل شي.
په غونډه کې ویناوالو پر دې ټینګار کړی، چې په افغانستان کې یوازې د بین الافغاني لارو پر مټ سوله تامینېدلی شي، نو حکومت او طالبانو ته پکار ده، چې دا ستر حقیقت ومني. د غونډې ګډونوال او د حرکت انقلاب اسلامي ګوند مشر عبدالحکیم منیب ویلي، افغانان باعزته سوله غواړي او د داسې سولې غوښتونکي دي چې په هېواد کې د ټولو شته ستونزو د حل سبب شي. د منیب په خبره، هغه سوله او مذاکرات چې د افغانانو په ګټه دي او کولای شي چې د لسیزو جګړه ختمه کړي، نه دا چې د نورو ستونزو او بې باوریو سبب شي، دوی تر هرکلی کوي.
بل پلو د حزب اسلامي د رهبري شورا غړی قطب الدین هلال هم وایي، چې په افغانستان کې روانه جګړه د هغو خبرو پر مټ د ختمېدو وړ ده، چې مشري او مالکیت یې د افغانانو په لاس کې وي. هلال وايي، سوله یوازې په خبرو نه راځي، بلکې قربانۍ غواړي او افغان حکومت باید قربانیو ته چمتووالی وښيي. هلال زیاته کړې: ((موږ د جګړو له امله ډېره قرباني ورکړه. اوس د دې وخت دی چې د سولې لپاره قرباني ورکړو. دا حقیقت باید ومنو، چې له قربانۍ او نرمښت پرته په افغانستان کې سوله نه شي تامينېدلی)). د دوی په خبره، سیاسی احزاب وايي چې ټولې خواوې باید د نظام د جوړښت او اساسي قانون د تعدیل په شمول هرډول قربانۍ ته چمتو شي.
سیاسي ګوندونو او دیني علماوو بیا په همدې غونډه کې د بین الافغاني مذاکراتو لپاره د یوه ملي او رښتیني ټیم پر جوړولو هم ټینګار کړی دی. دوی ویلي، حکومت هم باید د بین الافغاني مذاکراتو د پلاوي برخه وګرځي. د احزابو استازي او مشران وايي، سوله ملي پروسه ده، باید یرغمل او انحصار نه شي او له طالبانو سره د خبرو لپاره دې حکومتي افراد، سیاسي ګوندونه، سیاستوال او قومي مشران یا د اوسني پلاوي برخه وګرځي او یا دې هم یو بل مشترک او ټولو خواوو ته د منلو وړ ټیم جوړ شي. د سیاسي ګوندونو مشران وايي، دوی له ولسمشر د مذاکراتو لپاره د یوه ملي ټیم غوښتنه کړې وه، خو کوم ټیم چې جوړ شوی په خلکو کې نفوذ نه لري او نه هم طالبانو خبرو اترو ته ورسره کېني.
په ورته وخت کې ولسمشرۍ ماڼۍ بیا ویلي، چې د سولې لپاره د یوه ملي ټیم په جوړولو کار روان دی. د رسنیو د راپورونو له مخې امریکا په واضح توګه له افغان حکومته غوښتي، چې د سولې لپاره یو ملي او ټول منلی ټیم جوړ کړي. امریکا غوښتنه کړې چې ژر تر ژره دې دغه ټیم جوړ شي، ځکه د دغه کار لپاره ډېر وخت نشته. تېره ورځ د افغان سولې لپاره د امریکا ځانګړي استازي زلمي خلیلزاد هم ویلي وو، چې افغان حکومت باید د سولې لپاره یو ملي او رښتینی ټیم جوړ کړي، خو دغه ټیم باید ژر جوړ شي، ځکه وخت کم دی.
ارګ بیا ویلي چې دوی د سولې لپاره د یوه ملي ټیم پر جوړولو کار روان کړی دی، خو په دې برخه کې بېړه نه لري. د افغان سولې په اړه دغه څرګندونې داسې مهال کېږي، چې ټاکل شوې د روانې میاشتې په ۲۵مه، د طالبانو او امریکا ترمنځ د سولې بله مهمه غونډه وشي. خلیلزاد هيله ښودلې چې په دې غونډه له طالبانو سره په خبرو کې مهم پرمختګونه رامنځ ته شي.
