ارګ: د پاکستان او هند اړیکې افغان سولې سره تړاو نه لري

افغان حکومت د پاکستان د سفیر د وروستیو څرګندونو په غبرګون کې چې ویلي یې وو، د هند او پاکستان کړکېچ به افغان سوله هم اغېزمنه کړي وایي، پاکستان باید د بې بنسټه څرګندونو پر ځای په خپله خاوره کې د تروریزم پر ضد جدي او اغېزمن ګامونه پورته کړي. د ولسمشر د ویاند هارون چخانسوري له لورې رسنیو ته په لېږل شوي غږیږ کلیپ کې ویل شوي چې د افغان سولې په وړاندې لوی ګواښ په سیمه کې د تروریستي ډلو مرکزونه او ځالې دي. چخانسوري ویلي چې په سیمه کې د تروریزم له ځالو او مرکزونو څخه نور باید د وسیلې په توګه استفاده ونشي او په ځانګړي‌ توګه پاکستان باید له تروریزم سره د مبارزې په برخه کې عملي ګامونه واخلي. په ورته وخت کې د بهرنیو چارو وزارت هم د پاکستان د سفیر څرګندونې غیرمنطقي بللې او زیاته کړې یې ده چې د پاکستان او هند اړیکې د افغان سولې له بهیر سره هېڅ تړاو نه ‌لري.