ګلبدین حکمتیار: د سولې لپاره دې بهرني ځواکونه ژر تر ژره له افغانستان ووځي

د ولسمشریزو ټاکنو نوماند او د حزب اسلامي مشر ګلبدین حکمتیار ویلي د سولې لپاره باید ژر تر ژره بهرني ځواکونه له افغانستان ووځي. نوموړي چې نن یې په یوه خبري غونډه کې خبرې کولې وویل، د بهرنیو ځواکونو حضور په افغانستان کې د جګړو او د سیمې د هېوادونود اندېښنو سبب شوې ده، نو له همدې امله ددې اړتیا ده، چې دغه ځواکونه ژر تر ژره د یوه معقول، ټولمنلي او عملي مهالوېش له مخې له افغانستان ووځي. نوموړي همدا راز وویل، چې اوسنی حکومت په هېواد کې د سولې د راوستو، جګړو د ختمولو او امنیت د تامین وړتیا نه لري او ددې اړتیا ده، چې په یوه ملي، د ټولو اړخونو د منلو وړ او قوي حکومت بدل شي. نوموړي دا خبره نه ده واضح کړې چې دغه حکومت څه ډول بدل شي، خو د خپلو خبرو په دوام یې پر شفافو ټاکنو ټینګار وکړ. د حکمتیار په وینا د اوسني حکومت ستر مسوولیت دا دی، چې شفافې ټاکنې ترسره کړي او د تېرو پارلماني ټاکنو په څېر له درغلیو، ستونزو او بې باوریو ډکې ټاکنې به هېڅ لوري ته د منلو وړ نه وي. هغه پر طالبانو هم غږ وکړ، چې د سولې لار خپله کړي او د هېواد د ښې راتلونکې او سولې پرمختګ لپاره یو اوږدمهاله اوربند وکړي.