اروپایي کمېسیون افغانستان په تور لیست کې شامل کړی

اروپایي کمېسیون وایي افغانستان یې په تور لیست کې شامل کړی دی. دغه کمېسیون وایي دغه کار یې ځکه کړی دی چې افغان دولت له نشه یې توکو د لاس ته راغلو تورو پیسو سپینولو او د مالي فساد مخه نه ده نیولې. اروپایي کمېسیون دغه راز زیاتوي، د افغان دولت دا کمزوري ددې سبب شوې چې د اروپایي اتحادیې مالي سیسټم ته تاوان ورسېږي. د اروپایي کمیسیون له خوا په یوه خپره شوې خبرپاڼه کې راغلي چې د افغانستان په ګډون په دې لېست کې شاملو ۲۳ هېوادونو د تورو پیسو سپینولو په برخه کې جدي اقدامات نه دي کړي. خو د افغانستان بانک ویاند ایمل عاشور وایي، افغان دولت تل هڅه کړې ده چې له نشه یې توکو او مالي فساده د تر لاسه شویو پیسو د سپینولو مخه ونیسي او دا هڅې به یې دوامداره وساتي. نوموړي دغه راز ویلي چې ددوی هڅې ددې لامل شوې چې په ۲۰۱۷ میلادي کال کې د مالي اقداماتو نړیوالې ډلې د افغانستان نوم له خړ لیسته وایست.