ولسمشر غني: په یو کال کې به د افغانستان صادرات دوه میلیارد ډالرو ته لوړ شي

ولسمشر غني چې نن یې د نیمروز ولایت په مرکز زرنج ښار کې د خلکو یوې غونډې ته خبرې کولې وویل، پر خپلو پښو د افغانستان د درېدو لپاره باید د افغانستان صادرات ډېر شي او موخه دا ده چې په کال کې دوو میلیاردو ډالرو ته ورسېږي. هغه د خپلو خبرو پر دوام وویل چې افغانستان پرونی افغانستان نه دی، د وصل ژبه اقتصاد دی او افغانستان له داسې فرصتونو برخمن دی چې په ډېره کمه موده کې به دا هېواد د اسیا د څلور لارې په توګه خلک وپېژني. غني دغه راز راتلونکو ټاکنو ته په اشارې وویل، ټاکنې د خلکو د ارادو تمثیلونکي دي او د ولسمشرۍ راتلونکې ټاکنې به پر خپل وخت ترسره کېږي. هغه زیاته کړه، ټولو دولتي ادارو ته یې امر کړی دی چې په دې بهیر کې له هر ډول لاسوهنې ډډه وکړي. نوموړي دغه راز وویل، له فساد سره مبارزه یې له لومړیتوبونو څخه وه او دا چاره به پوره شدت دوام پیدا کوي. ولسمشر فساد کوونکو ته په اشارې وویل، سرمایه غلا نه ده، سرمایه د فکر او عمل له لارې لاس ته راځي او مهمه ده چې دا ذهنیت باید تغیر وکړي. ولسمشر غني په دې سفر کې د چابهار بندر په لور د افغانستان د لومړنۍ صادراتي محمولې د حرکت کولو په مراسمو کې هم ګډون وکړ او دغه لار یې د افغانستان د پرمختګ لپاره یو ستر ګام وباله او د نیمروز له خصوصي سکټوره یې غوښتنه وکړه چې په یاد ولایت کې لا ډېره پانګونه وکړي.