هند له افغان پوځ سره د همکارۍ او مرستې ژمنه کړې ده

د راپورونو له مخې د ملي دفاع سرپرست وزیر اسد الله خالد په نوي ډهلي کې د هند د بهرنیو چارو له وزیرې سوشما سوارج سره کتلي دي. هندۍ وزیرې په دې لیدنه کې ویلي، چې دوی د تل په څېر له افغان پوځ او خلکو سره خپلو مرستو او همکاریو ته ادامه ورکوي. په ورته وخت کې اسدالله خالد له نوموړې سره د لیدنې پر مهال ویلي، چې افغان پوځ د ترهګرۍ ضد جګړې په لومړۍ کرښه کې دی، نو د هند په څېر د خواخوږو هېوادونو همکاریو او مرستو ته اړتیا لري. هند د هغو هېوادونو له ډلې دی، چې هر کال سلګونه افغان پوځیانو ته روزنه ورکوي. همدا اوس هم د هند په نظامي پوهنتونونو کې ګڼ افغان نظامیان زده کړې کوي او تر زده کړو وروسته هېواد ته راګرځي. هند څو څو ځله ژمنه کړې چې لا ډېرو افغان پوځيانو ته به په خپل هېواد کې د زده کړو زمینه برابره کړي.