د وسله والو طالبانو او امریکايي استازي ترمنځ د خبرو پنځم پړاو نن په دوحه کې پيلېږي. امریکايي لوري ویلي چې مذاکرات مهم پړاو ته رسېدلي دي، نو له همدې امله ښایي د دې لیدنې پایلې ګټورې وي. په قطر کې د طالبانو سیاسي دفتر هم وایي چې پرونۍ غونډه تعارفي وه او په نننۍ غونډه کې به پر مهمو مسایلو خبرې وشي. د دغه دفتر ویاند سهیل شاهین وایي چې پنځمه غونډه به څلور ورځې دوام کوي او ښایي امریکایي او طالب لوری مهمو هوکړو ته سره ورسېږي.
ټاکل شوې وه چې د قطر غونډه پرون د فبرورۍ په ۲۵مه پیل شي، خو وسله والو طالبانو ویلي چې پرون یوازې تعارفي ناسته وه او په دې ناسته کې د طالبانو مهم غړي او د دغه ډلې سیاسي مرستیال ملا برادر هم ګډون کړی و. سهیل شاهین وايي، سره له دې چې ملا برادر په قطر کې دی، خو له امریکا سره په مذاکراتو کې به د طالب پلاوي مشري شیر عباس ستانکزی کوي.
سهیل شاهین زیاتوي چې د غونډې اجنډا د تېرو غونډو په څېر ده او ډېر تمرکز به یې له افغانستانه د بهرنیو ځواکونو پر وتلو وي. د شاهین په خبره، د ټولو بهرنیو ځواکونو وتل او همدا راز افغان خاوره د نورو هېوادونو پر ضد نه کارېدل هغه مهم مسایل دي، چې ورباندې بحث کېږي. شاهین زیاته کړې: ((له هېواده د بهرنیو ځواکونو وتل. له افغان خاورې چا ته د ضرر نه رسېدل د بحث مهم مسایل دي. د دې ترڅنګ به د نورو مسایلو په اړه هم کاري ډلې خپل فعالیتونه او مذاکرات مخ ته وړي. دوی به هڅه کوي چې د مذاکراتو په دې پړاو کې د هوکړې مسوده ترتیب کړي)).
په ورته وخت کې د افغان سولې لپاره د امریکا ځانګړي استازي زلمي خلیلزاد هم ویلي، چې له طالبانو سره خبرې مهم پړاو ته رسېدلې دي. د خلیلزاد په خبره، په قطر کې له مهمو طالب استازو سره ګوري. هغه تېره ورځ په یوه ټوېټ کې لیکلي وو: ((دوحې ته ورسېدم، چې د طالبانو له یوه ډېر باصلاحیته پلاوي سره وګورم. دا خورا ښه موقع کېدای شي. د کوربه توب لپاره د قطر او د سفر د زمینې مساعدولو لپاره له پاکستان مننه کوو. اوس جدي او صمیمانه کار پیلېدونکی دی)).
پخواني طالب چارواکي او په هېواد کې ځینې سیاسي ډلې د طالبانو او امریکا ترمنځ دغو خبرو ته هیله من دي. د دوی په خبره، په دغو مذاکراتو کې د طالبانو با صلاحیته او مهم کسان ګډون کوي، نو ښايي د امریکا او طالبانو ترمنځ مهمې هوکړې رامنځ ته شي. د طالبانو د واکمنۍ پر مهال لوی څارنوال جلال الدین شینواري ویلي، ملا برادر د طالبانو په لیکو کې مهم رول لري. د شینواري په خبره، دی په نظامي برخه کې ډېر پلویان لري او ګډون یې د قطر په غونډه کې مهم دی. شینواری زیاتوي: ((ملا برادر د طالبانو په لیکو کې په تېره په نظامي لیکو کې ډېر مهم کس دی. هغه ډېر اغېز لري. پرېکړې یې هم د طالبانو په لیکو کې اغېز لرلی شي، نو ښایي دغه غونډه مثبتې پایلې ولري)).
د سولې عالي شورا بیا وايي، وسله وال طالبان که رښتیا سوله غواړي، نو باید له افغان حکومت سره مخامخ خبرې وکړي. د دې شورا مرستیال عبدالخبیر اوچقون تېره ورځ په یوه غونډه کې د خبرو پرمهال وویل، طالبان باید په دې پوه شي چې یوازې افغان حکومت د دوی غوښتنې پوره کولی شي. د اوچقون په خبره، بل هېڅ لوری د دې وړتیا نه لري چې د طالبانو غوښتنې پوره کړي، ځکه افغانستان یو مستقل او خپلواک حکومت لري.
اجرایه رییس ډاکټر عبدالله عبدالله هم تېره ورځ د وزیرانو شورا په غونډه کې د خبرو پر مهال وویل، چې که طالبان په رښتیا سولې ته ژمن وي او سوله غواړي؛ نو له افغان حکومت سره دې مخامخ خبرې وکړي. خو وسله والو طالبانو تر دې دمه له افغان حکومت سره خبرو ته هېڅ راز تیاری نه دی ښودلی.
