ملا ضعیف: قطر کې به پر اوربند او بین الافغاني مذاکراتو هم خبرې وشي

د طالبانو د واکمنۍ پر مهال په پاکستان کې ددې ډلې سفیر ملا عبدالسلام ضعیف وایي، په دوحه کې د طالب استازو او امریکایي پلاوي ترمنځ روانه ناسته کې کېدونکې پرېکړې به عملي کېږي. دا ناسته پرون پيل شوې او تمه ده چې درې ورځې به دوام وکړي. ضعیف ویلي، چې په دې ناسته کې د ملا برادر شتون مهم دی، ځکه دی اوسمهال په طالبانو کې تر ټولو قوي څېره او د امارت سیاسي مرستیال دی. نوموړي ویلي، په روانه ناسته کې به پر پخوانۍ اجنډا سربېره د اوربند خبره او د بین الافغاني مذاکراتو پر موضوع هم خبرې کېږي. بل لور ته طالبانو ته نږدې سرچینو بي بي سي ته ویلي، د قطر په غونډه کې ملګري ملتونه او ناروې هېواد هم ښکېل دي، او دوی له ښکېلو غاړو سره په تخنیکي برخه کې مرسته کوي. دا سرچینه وایي، د ملګرو ملتونو او ناروې رول به په قوي ګومان دا وي چې د ضمانتونو، د مسودې د ترتیب، د هوکړې د پلې کېدو او د تظمین برخه کې لارښوونه او مرسته وکړي.