په قطر کې د طالبانو او امریکا د مخامخ خبرو کاري ټیمونو پر مشخصه اجنډا کار پیل کړی دی. وسله والو طالبانو وړمه ورځ تر تعارفي غونډې وروسته پرون له امریکا سره رسمي او مخامخ مذاکرات پيل کړل. دا د طالبانو او امریکا ترمنځ د خبرو پنځم پړاو دی او دواړه لوري تمه لري چې مهمو پایلو ته سره ورسېږي. د طالبانو د قطر دفتر ویاند سهیل شاهین تېره ورځ له رسنیو سره په خبرو کې ویلي، چې د قطر ناسته ورته پوره اهمیت لري او دوی په پوره رښتینولۍ غواړي د سولې خبرې مخ ته یوسي.
د غونډې له پیل سره سم د دواړو لورو کاري ټیمونو له افغانستانه د بهرنیو ځواکونو پر وتلو او همدا راز له افغان خاورې امریکا او نورو هېوادونو ته پر ضرر نه رسېدو خبرې کړې دي. دوی پر یادو مسایلو بحثونه کوي او هڅه یې دا ده، چې پر همدغو دوو موضوعاتو توافق ته ورسېږي او په دې برخه کې مسوده جوړه کړي. سهیل شاهین هم په خپلو خبرو کې ویلي، چې کاري ډلې به د دواړو لورو د توافق لپاره د مسودې پر جوړولو کار کوي.
تر دې مخکې ویل شوي وو، چې د مذاکراتو په دغه پړاو کې به د طالبانو او امریکا ترمنځ پر اوربند او له افغان حکومت سره پر مخامخ خبرو هوکړه کېږي، خو اوس طالبان وايي چې دوی یوازې له افغانستانه د بهرنیو ځواکونو پر وتلو او همدا راز له افغان خاورې کوم هېواد ته پر ضرر نه رسېدلو بحثونه کوي.
بل پلو طالب وسله والو ته نږدې سرچینو رسنیو ته ویلي، چې که پر یادو دوو مسایلو امریکا له طالبانو سره هوکړه ونه کړي، نو ښایي پر هېڅ شي هم هوکړه رامنځ ته نه شي. د سرچینو په خبره، د بینالافغاني مذاکراتو د پيل او همدا راز اوربند لپاره د طالبانو تر ټولو ستر شرط دا دی، چې لومړی دې امریکايي ځواکونه له طالبانو سره له افغانستانه د ځواکونو پر وتلو سلا وکړي. په همدې موخه ټاکل شوې چې په راتلونکې میلادي میاشتې یا مارچ کې هم د طالبانو او امریکا ترمنځ خبرې وشي. که په اوسنیو خبرو کې پرمختګ وشي، نو د مارچ په مذاکراتو کې به پر بین الافغاني مذاکراتو او اوربند بحثونه کېږي.
پخواني طالب چارواکي سیداکبر اغا هم ویلي چې که امریکا له طالبانو سره د ټولو بهرنیو ځواکونو د وتلو پر سر هوکړې ته ونه رسېږي، نو دغه ډله د اوربند او بین الافغاني مذاکراتو په اړه خبرې نه کوي. د ده په خبره، د بهرنیو ځواکونو وتل د سولې د ټولو پرمختګونو لپاره لومړیتوب لري.
بل پلو د افغانستان لپاره د روسیې د ولسمشر ځانګړي استازي ضمیر کابلوف بیا ویلي، چې طالبان او امریکا په خپلو کې ځینو هوکړو ته سره رسېدلي دي. نوموړي د روسیې له ۲۴ ټلوېزیون سره په مرکه کې ویلي، امریکا او طالبان ځینو مهمو هوکړو ته رسېدلي دي، خو ښه به دا وي چې د دغو دواړو لورو خوښه پر افغانانو تحمیل نه شي. هغه زیاته کړې، روسیه او امریکا باید له هغو خبرو ملاتړ وکړي، چې مشري او مالکیت یې د افغانانو په لاس کې وي.
کابلوف دا هم ویلي چې که طالبان له امریکا سره هوکړې ته ورسېږي، نو پر دغه ډله به نړیوال بندیزونه پر خپل ځای وي، خو که افغان حکومت وغواړي، نو د ملګرو ملتونو امنیت شورا پر دغه ډله شته بندیزونه راکمولی شي او یا لږ تر لږه طالب استازو ته د سفرونو په برخه کې اسانتیا برابرولی شي.
د طالبانو او امریکا ترمنځ د مخامخ مذاکراتو په اړه تر دې دمه لا ډېر جزیات نه دي ورکړل شوي، خو وسله وال طالبان وایي چې دغه مذاکرات به تر دریو ورځو پورې دوام وکړي.
