طالبانو اسوشیټیډ پرس ته: د سولې په راتګ سره به طالبان د ملي اردو لیکو کې شامل شي

که څه هم تر اوسه د طالبانو او امریکایي استازو ترمنځ په قطر کې د پیل شویو خبرو رسمي جزییات نه دي په ډاګه شوي خو اسوشیټیډ پرس وایي، امریکا او طالب استازي له افغانستانه د امریکایي سرتېرو د وتلو په اړه یوه توافق ته نږدې شوي دي. سرچینې د طالبانو د قطر د سیاسي دفتر د ویاند سهیل شاهین له خولې ویلي، دوی خوشبینه دي چې له افغانستانه د امریکایي ځواکونو د وتلو او دا چې طالبان به ضمانت ورکوي چې د افغانستان خاوره به د بل کوم هېواد پر ضد نه کارول کېږي، یوه توافق ته ورسېږي. سرچینه د شاهین له قوله کاږي، هر کله چې امریکایي ځواکونه له افغانستانه ووتل او دغلته یو اسلامي دولت جوړ شي بیا نو جګړې ته اړتیا نشته او سوله به راځي. شاهین زیاته کړې کله چې سوله راغله نو طالب وسله وال به د افغانستان د ملي اردو په لیکو کې شامل شي. خو افغان حکومت چې تر اوسه د امریکا او طالب استازو له خبرو بهر پاتې دی وایي څو پورې چې په قطر کې د روانو خبرو رسمي جزییات نه وي په ډاګه شوي تر هغو پورې ټولې خبرې تر وخت مخکې دي.