طالبان: د افغان مسالې پر کورني اړخ وروسته خبرې کېدای شي

په قطر کې د طالبانو د سیاسي دفتر ویاند سهیل شاهین ویلي، طالب استازي نن ورځ له امریکایي اړخ سره له افغانستانه د ټولو بهرنیو ځواکونو پر وتلو او دا چې هیڅوک له افغان خاورې د نورو هېوادونو پر ضد کار وانخلي خبرې کوي. بي بي سي د سهیل شاهین له قوله ویلي، تېره ورځ یې هم پر همدې دوو لویو مسلو خبرې کړې دي. شاهین زیاته کړې، د طالب او امریکا د استازو هڅه دا ده چې نن پر یادو مسلو یوې پایلې ته ورسېږي. شاهین دغه راز زیاته کړې، دوی دا مني چې افغان حکومت د شخړې یوه برخه دی، خو د هغه په خبره دوی اوس د افغان مسلې په بهرني اړخ کې کار کوي چې له امریکایانو سره د بهرنیو ځواکونو پر وتلو غږېږي. دی وايي، له امریکايي پلاوي سره د خبرو پایلو او یوې هوکړې ته د رسېدو لپاره یې یوه ډله ټاکلې ده. نوموړي ویلي، د افغان شخړې په تړاو ځینې کورنۍ مسلې شته چې د اجنډا له مخې پرې وروسته خبرې کېدای شي.