ولسمشر غني: تلپاتې سولې ته د رسېدو یوازینۍ لار د یو بل منل دي

ولسمشر غني نن په کابل کې د سولې لپاره د افغان ښځو ملي اجماع کې د خبرو پر مهال وویل، د افغانستان ولس ټول امید او ارزوګانې لري، حاضر دي چې له دې ټول درد او غم سره مخته لاړ شي. هغه وویل شاتګ د هیچا په ګټه نه دی او ټول افغانان غواړي اباد افغانستان وویني. نوموړي وویل د اباد او سوکاله افغانستان لپاره باید یو بل ومنو او افغانان یوازې د یو بل په منلو سره تلپاتې سولې ته رسېدلی شي. هغه د غونډې ګډونوالو ته په خطاب کې وویل، ټول افغانان په دې باور دي چې دا وطن اباد شي او دغه راز ټول غواړي طبیعي زیرمې د افغانانو په لاس کې وي او دا چاره د افغانانو یووالي ته اړتیا لري. ولسمشر زیاته کړې، افغانان درانه دودونه لري چې تل یې د جنګ مخه ورباندې نیولې ده. نوموړي په کابل کې جوړېدونکې مشورتي لویې جرګې ته په اشارې وویل، افغانستان د جرګو او مرکو وطن دی او اوس ددې وخت را رسېدلی دی چې باید په اتفاق یوه لاره برابره کړي څو یو بل ته په قناعت ورکولو سره روانې اوږدې جګړې ته د پای ټکی کېږدي.