ننګرهار؛ دره نور ولسوالۍ کې زلزله ځپلو ته استوګنیز کمپونه جوړېږي

د هیواد په ختیځ زون کې د ورستیو زلزلو له امله د کونړ ولایت ترڅنګ د ننګرهار دره نور ولسوالۍ هم زیانمنه شوې، چې په ځانګړي ډول د ستن، مچکنډول او شیمل درې کلیو اوسېدونکي له خپلو مېنو بې‌ ځایه شوي دي. ځايي اوسېدونکو ویلي، چې اسلامي امارت او خیریه موسسو ژر تر ژره د لومړنیو مرستو رسونه پیل کړه، خو مرستې د ټولو اړمنو کورنیو لپاره بسنه نه کوي او ګڼ شمېر کورنۍ لا هم تر آسمان لاندې شپې ورځې تېروي. په ورته وخت کې د چارو د سمون ملي ادارې د انسجام رییس د دره نور ولسوالۍ ته د سفر پر مهال ویلي، چې ډېر ژر به د بې ‌کوره شویو کورنیو لپاره د استوګنې کمپونه جوړ شي او هغه کورونه چې زلزلې ویجاړ کړي، بېرته به ورغول شي.