فراه او جوز جان کې د ۲ جلا ترافیکي پېښو له کبله ۱۴ کسانو ته مرګ ژوبله اوښتې

د فراه ولایت ځایي سرچینو رسنیو ته ویلي، چې په دغه ولایت کې د یوه ۵۸۰ مسافر وړونکي موټر او د تېلو له یوه ټانکر ترمنځ د ټکر له امله، دوه تنه مړه شوي دي. سرچینې ویلي، چې دا پېښه تېره شپه د فراه – نیمروز په لویه لار کې رامنځته شوې ده، چې د پېښې دواړه قربانیان د مسافر وړونکي موټر او د ټانکر چلوونکي وو. د فراه ولایت ځایي چارواکو تر اوسه په دې اړه څه نه‌دي ویلي. د یوه بل خبر له مخې د جوزجان ولایت ځایي امنیتي مسوولینو ویلي، چې د اقچې ولسوالۍ په قره بوین علیایي سیمه کې د یو سراچه ډوله او فېلډر موټر د ټکر په پېښه کې هم لږ ترلږه ۱۲ کسانو ته مرګ ژوبله اوښتې ده.