په تېرو ۶ میاشتو کې ۱۵ زره بهرنیو وګړو افغانستان ته تګ راتګ کړی

د احصايې او مالوماتو ملي ادارې ویلي، چې د روان لمریز کال په لومړۍ نیمايي کې هېواد ته نږدې ۱۵ زره بهرنیو وګړو تګ راتګ کړی دی. دغې ادارې په یوه خبرپاڼه کې ویلي، چې د احصايې او مالوماتو ملي ادارې د ۱۴۰۴ کال په لومړیو شپږو میاشتو کې د هوايي ډګرونو او ځمکنيو بندرونو له لارې هېواد ته د ۱۴ زره ۸۲۹ بهرنيو وګړو تګ او راتګ ثبت کړی دی.  د خبرپاڼې د مالوماتو له مخې په یاده موده کې د ۴۲۰ ښځینه‌وو په ګډون ۸ زره ۹۶ بهرني وګړي هېواد ته راغلي او د ۲۰۳ ښځینه‌وو په ګډون ۶ زره ۷۳۳ نور له هېواد څخه وتلي دي. سرچینې زیاته کړې، چې په یاده موده کې  ۷ زره ۹۷۵ کسان له ځمکنیو بندرونو  او ۱۲۱ تنه نور د هوا له لارې هېواد ته راغلي، چې له دې ډلې ۱۳۱۵ تنه د هېواد د لرغونو او تاریخي سیمو د لیدنې او پاتې نور چې ۶ زره ۷۸۱ تنه کېږي، د کار او زده‌کړو په موخه راغلي دي.