بهرنیو چارو وزارت: د اسحاق ډار وروستۍ څرګندونې له حقیقته لرې دي

د افغانستان د بهرنیو چارو وزارت د پاکستان د بهرنیو چارو وزیر وروستۍ څرګندونې ناسمې بللې دي، چې ګواکې د بهرنیو چارو وزیر امیر خان متقي له نوموړي سره په یوه ورځ کې شپږ ځله ټلیفوڼي اړیکه نیولې ده. دغه وزارت زیاته کړې، چې د دواړو لورو تر منځ لومړۍ اړیکه د متقابل تفاهم او همغږۍ په چوکاټ کې شوې وه، چې په ترڅ کې اسحاق ډار له وضعیت څخه د ناخبرۍ څرګندونه کړې وه او ژمنه یې کړې وه، چې وروسته به اړیکه نیسي. د وزارت په خبره، د همدې لړۍ په دوام دویم ځل هم اړیکه وشوه، خو د درېیم ځل لپاره یوه ورځ وروسته ډار بیا د اړیکې هڅه وکړه، خو د بېلابېلو دلایلو له امله عملي نه شوه. د بهرنیو چارو وزارت زیاتوي، چې د هېوادونو اړیکې باید د متقابل احترام او پر واقعیتونو ولاړ تعامل پر بنسټ وي، او دا ډول ناسمې څرګندونې د دواړو هېوادونو د درناوي او دیپلوماتیک تعامل له روحیې سره په ټکر کې دي.