مجاهد: پاکستان ته به په مناسب وخت کې اړین ځواب ورکړل شي

د ا.ا ویاند وایي، د پاکستاني رژیم له لوري د پکتيکا، خوست او کونړ ولایتونو پر ځینو سیمو د تېرې شپې هوايي بریدونه د افغانستان د حریم ښکاره نقض او د پاکستانۍ ادارې له خوا له ټولو منل شویو نړۍوالو نورمونو سره څرګند ټکر دی. نوموړي زیاته کړې، چې د پاکستاني رژیم دا ډول جنایتونه، نه یوازې کومه لاسته راوړنه نه لري، بلکې یو ځل بیا ثابته شوه چې د ناسمو معلوماتو پر بنسټ اقدام د وضعیت د لا ترینګلتیا او د پاکستان د پوځي رژیم د ناکامۍ او رسوایۍ لامل ګرځي. مجاهد وايي، د افغانستان ا.ا دغه سرغړونه او بریدونه په کلکه غندي او یو ځل بیا ټینګار کوي، چې له خپل هوايي او ځمکني حریم او خلکو څخه دفاع خپل شرعي حق بولي او په مناسب وخت کې به اړین ځواب ورکړي.