ترافیکي پېښې په افغانستان کې د مړینې یو اصلي عامل دی

د ملګرو ملتونو د بشري استوګنې پروګرام پر خپله اېکس پاڼه لیکلي، چې ترافیکي پېښې د مخنیوي وړ دي او دا په افغانستان کې د مړینې یو اصلي عامل دی. یاد سازمان وایي د سړکونو په ښه کېدو، د پیاده کسانو خوندیتوب ته لومړیتوب ورکول او سرعت کمول کولی شي ښارونه د ټولو لپاره خوندي کړي. ملګرو ملتونو دا څرګندونې داسې مهال کړې چې په افغانستان کې هر کال لسګونه کسان د ترافیکي پېښو له کبله خپل ژوند له لاسه ورکوي. څه موده مخکې په هرات کې یو مسافر وړونکی موټر چې له ایران څخه راستانه شوي کسان پکې سپاره و، ترافیکي پېښه وکړه چې په پایله کې یې ۸۰ کسانو ژوند له لاسه ورکړ. د سړکونو خرابوالی، ترافیکي قوانینو ته نه پاملرنه، ډېر سرعت او د موټرچلوونکو بې غوري په افغانستان کې د ترافیکي پېښو لوی لاملونه ګڼل کېږي.