د تهران غونډه؛ افغانستان پکې د نه ګډون پرېکړه کړې

د بهرنیو چارو وزارت د عامه اړیکو رییس ضیا احمد تکل ویلي، چې په تهران کې د افغانستان په تړاو د سیمې د یو شمېر هېوادونو د ځانګړو استازو په کچه په جوړه شوې غونډه کې د افغانستان حکومت ته هم د ګډون بلنه ورکړل شوې وه، خو اسلامي امارت پرېکړه کړې چې په دې ناسته کې برخه وانخلي. تکل طلوع نیوز ته د ا.ا د نه ګډون لامل په اړه ویلي، چې افغانستان اوسمهال د شته سیمه‌ییزو سازمانونو او فارمټونو له لارې د سیمې له هېوادونو سره فعالې اړیکې لري او په دغه برخه کې یې ښه پرمختګ هم کړی دی. نوموړي زیاته کړې چې د بهرنیو چارو وزارت د سیمې له هېوادونو سره د ګډ تفاهم او همکاریو د لا پراختیا لپاره د شته دریځونو پر پیاوړتیا ټینګار کوي.