وسله والو طالبانو له امریکا سره تر خبرو او ځینو لومړنیو هوکړو وروسته، اوس د بین الافغاني مذاکراتو د پیل لپاره تیاری پيل کړی دی. د راپورونو له مخې، طالب مشران دمګړۍ په دې اړه په سلا مشورو لګیا دي، چې بین الافغاني مذاکرات څه ډول او له کومه ځایه پیل کړي. بل پلو د سولې عالي شورا بیا وايي چې د افغانستان روانه جګړه د بین الافغاني مذاکراتو پر مټ د حل وړ ده او طالبانو ته پکار ده، چې له افغانانو سره مخامخ خبرو ته تیاری وښيي.
وروسته له دې چې د طالبانو او امریکا ترمنځ په شپاړس ورځنیو مذاکراتو کې پر ځینو مسایلو لومړنۍ هوکړې رامنځ ته شوې دي، اوس دغه ډله پر دې لګیا ده چې څه ډول بین الافغاني مذاکرات پيل کړي. وسله والو طالبانو ته نږدې سرچینو رسنیو ته ویلي، چې د دوی مشران د بین الافغاني مذاکراتو پر څرنګوالي بحثونه پيل کړي دي او موخه یې دا ده، چې د افغانانو ترمنځ خبرو ته زمینه برابره کړي.
طالبانو ته نږدې سرچینې وایي، د امریکا او طالبانو ترمنځ په راتلونکې غونډه کې د قطر د تېرې غونډې پر توافقاتو لاسلیکونه کېږي او له دې امله چې یاد توافقات نهايي دي، اوس طالبانو له خپلو مشرانو سره د بین الافغاني مذاکراتو په تړاو سلا مشورې پیل کړې دي. د سرچینې په خبره، تر اوسه د طالبانو دغه سلا مشورې نهايي نه دي، چې راتلونکې ناسته کې به له حکومتي استازو سره خبرې وکړي او که نه.
بل پلو د دوحې د راتلونکې غونډې ګډونوال ملا عبدالسلام ضعیف وایي، طالبان له امریکا سره هوکړې لاسلیکوي او اوس د بین الافغاني مذاکراتو لپاره سلا مشورې روانې دي. ضعیف ویلي: ((طالبان به هم له خپلو مشرانو سره سلا مشورې کوي، دغه راز افغان حکومت به هم له سیاسیونو او خلکو سره خبرې کوي. له سلا مشورو وروسته به هر لوری خپله پرېکړه کوي)).
بل پلو د مسکو بین الافغاني ډیالوګ دویمې ناستې په تړاو ویل کېږي، چې دغه ناسته به د اپرېل پر لسمه په قطر کې جوړه شي او ټاکل شوې چې په دې ناسته کې به د افغان سیاستوالو یو لوی هیئت هم ګډون وکړي. د ولسي جرګې غړی عرفان الله عرفان وايي، دغه غونډه د افغانستان لپاره مهمه ده، خو په اړه یې ځینې اندېښنې شته دي. عرفان زیاتوي: ((د سولې له خبرو دې افغان حکومت او افغانان خبر وي. دوی ته باید معلومات ورکړل شي او په دې توګه دې شفافیت رامنځ ته شي. دا د افغانستان د حکومت او افغانانو لپاره مهمه ده)).
بل پلو د سولې عالي شورا بیا وایي، چې د افغان سیاستوالو او طالب استازو ترمنځ د بین الافغاني ډیالوګ په دویمه ناسته کې، د ګډون لپاره باید حکومت خپل استازي مشخص کړي. د سولې عالي شورا غړی عبدالحکیم مجاهد وايي، هیله لري چې افغان حکومت د مذاکراتو په دې پړاو کې ګډون وکړي.
د بین الافغاني مذاکراتو د پيل په اړه داسې مهال د سلا مشورو د پيلولو خبره کېږي، چې ټاکل شوې په راتلونکې میلادي میاشت کې د طالبانو او امریکا ترمنځ د خبرو شپږم پړاو پيل شي. تېره ورځ طالب سرچینو رسنیو ته ویلي وو، چې د طالبانو او امریکا ترمنځ د خبرو شپږم پړاو د راتلونکې میلادي میاشتې په لومړیو کې ترسره کېږي.
ټاکل شوې چې د خبرو په دغه پړاو کې به رامنځ ته شوې مسوده لاسلیک شي او عملاً به د جګړې د پای او مذاکراتو د دوام لپاره ګامونه اوچت کړل شي. افغان حکومت لا هم ټینګار کوي چې د سولې خبرې باید د افغانانو ترمنځ او د افغانانو په مشرۍ ترسره شي، خو طالبان وایي چې تر هر څه لومړی باید د جګړې بهرنی اړخ له منځه یوسي.
