امریکا وایي غواړي چې طالبان او افغان حکومت مخامخ خبرې وکړي

 د امریکا د بهرنیو چارو وزیر مایک پمپیو تېره ورځ په یوه تازه مرکه کې ویلي، دوی هلې ځلې پيل کړې چې د مذاکراتو پر مټ په افغانستان کې روانه جګړه ختمه کړي. دده په خبره دوی غواړي چې طالبان او افغان حکومت مخامخ خبرې وکړي او په دې توګه په دغه هېواد کې روانه جګړه ختمه او پر ځای یې تلپاتې سوله او ثبات راشي. پمپیو زیاتوي چې ځانګړی استازی یې زلمی خلیلزاد امریکا ته راستون شوی دی او له طالبانو سره په خبرو کې مهم پرمختګونه شوي دي. هغه ټینګار کړی چې په دې مذاکراتو کې به دامریکا او نړۍ امنیت ته جدي توجه کېږي او امریکا هم په دې پوه ده چې له کومې ډلې سره په خبرو بوخت ده او کومې پایلې ته باید ورسېږي. دده په وینا ستره موخه یې دا ده، چې امریکایان خوندي وي.