ایران: ملګري ملتونو دې افغانستان ته د داعش د لېږد مخنیوی وکړي

د ایران پارلمان وایي امریکا او ځینې نور ملګري هېوادونه یې هڅه کوي چې په عراق کې ماتې خوړلي داعشیان افغانستان ته ولېږدوي. د پارلمان مهمو غړو پر ملګرو ملتونو غږ کړی چې د امریکايي حکومت ددغه ناقانونه کړنو پر وړاندې اقدام وکړي او ژر تر ژره دې دغه مسئله جدي ونیسي. ایران وایي امریکا او ملګري یې په لوی لاس هڅه کوي چې په افغانستان کې دداعش ډلې غړي ځای پر ځای کړي او بیا یې د خپل موخو لپاره وکاروي. ایران او روسیې تر دې وړاندې هم داسې ادعا کړې وه. دوی ویلي وو، چې ناپېژانده الوتکې افغانستان کې داعشیان یوې او بلې خوا ته لېږدوي، خو امریکا بیا دغه ډول ادعاوې بې بنسټه بللې دي او د ناپېژانده الوتکو په اړه یې تر دې دمه معلومات نه دي ورکړي.