حکومت وايي د کابل پروسې درېیمه غونډه ځنډول شوې

د بهرنیو چارو وزارت وايي، چې دغه ناسته به اوس د سولې د مشورتي جرګې له پرېکړې وروسته جوړېږي. ټاکل شوې وه، چې په دې ناسته کې تر ډېره د افغانستان د سولې لپاره پر نړیوالو هڅو خبرې وشي. په پلان کې وه چې د کابل پروسې درېیمه ناسته د تېر په څېر په فبرورۍ کې جوړه شي خو د نامعلومو دلایلو له کبله وځنډول شوه. تېر کال د کابل بهیر دویمه ناسته کې د ۲۰ هېوادونو او درېیو نړیوالو بنسټونو استازو ګډون درلود. د یادې غونډې مهم اړخونه له وسله والو طالبانو سره د سولې خبرو لارې چارې، له نشه یي توکو سره مبارزه او له پاکستان سره هر اړخیزو خبرو ته چمتوالی و. اوس د بهرنیو چارو وزارت چارواکي وايي، دا ناسته په کور د ننه د سولې په اړه د ملي اجماع له رامنځته کیدو وروسته په کابل کې جوړیږي. د یاد وزارت ویاند صبغت الله احمدي وايي په دې ناسته کې به د افغانستان د سولې په اړه ټولې هڅې وروستی شي. د سولې مشورتي جرګه هم چې ټاکل شوي وه د کب په میاشت کې جوړه شي د ثور تر میاشتې ځنډیدلي ده.