روسیه: امریکا باید له افغانستان خپلې نظامي اډې ټولې کړي

د ریانوویستي خبري آژانس د راپور له مخې د افغانستان لپاره د روسیې د ولسمشر ځانګړي استازي ویلي، په افغانستان کې د ۲۰۱۴ کال د هوکړې له مخې ښايي امریکایي پوځيان خپلې اډې جوړې کړي، خو دغه اډو ته اړتیا نشته ده. دده په وینا د قطر د ناستې مهمه مسئله د امریکایي ځواکونو وتل دي، نو کله چې ددوی د وتلو مسئله مطرح کېږي نو د نظامي اډو د جوړېدو اړتیا هم نه لیدل کېږي. هغه همدا راز ویلي، امریکا له روسیې او چین غوښتي چې له طالبانو سره د روانو مذاکراتو په برخه کې همکاري ورسره وکړي. دده په وینا دواړه هېوادونو په دې مذاکراتو کې همکارۍ او مرستې ته ژمن دي. کابلوف وايي، دوی په افغانستان کې د سولې د راتګ او په دغه هېواد کې د روانو جګړو او نظامي اقداماتو د پای ته رسېدو ملاتړ کوي.