طالبان: هېوادوال دې خپل اولادونه ښوونځیو ته ولېږي

وسله والو طالبانو د نوي ښوونیز کال د پیل په مناسبت پیغام کې له خلکو غوښتي چې خپل اولادونه ښوونځیو ته ولېږي. د یادې ډلې ویاند ذبيح الله مجاهد له خوا رسنیو ته په استول شوې خبرپاڼه کې هېوادوالو ته ډاډ ورکړل شوى دی چې نوی ښوونیز کال به د دوى لپاره له بریاوو او لاسته راوړنو ډک وي. سرچينې زياته کړې چې تېره مياشت يې د هېواد په بېلابېلو ولايتونو کې د پوهنې برخې ستونزو د هواري او پرمختګ لپاره هر اړخیز تعلیمي سیمینارونه ترسره کړي او په نوي تعلیمي کال کې به یې عملي ګټې د تعلیم او تربیې په ډګر کې ټول هېوادوال په خپلو سترګو وويني. طالبانو د ښوونځیو له مدیرانو، ښوونکو او د ښوونې او روزنې د څانګې له ټولو کارکوونکو هيله کړې چې د نوی ښوونیز کال په لوړو حوصلو او نوو ولولو سره د تعلیم او تربیې او عالي تحصیلاتو له تعلیمي اصولو سره سم پیل کړي او په پوره اخلاص او صداقت سره زده کوونکو ته د ښو زده کړود زمینې له برابرولو سره خپل ایماني او ملي رسالت ادا کړي.