ناټو: د تلپاتې سولې لپاره بین الافغاني مذاکرات اړین دي

په افغانستان کې د ناټو ملکي استازى وايي، د دوامداره سولې لپاره بين الافغاني مذاکرات اړين دي او بايد د ټولو افغانانو غږ واورېدل شي. د ناټو ملکي استازي نيکولاس کى دا څرګندونې په ټولنيزه شبکه ټويټر کې د خلکو د بېلابېلو پوښتنو په ځواب کې کړې دي. نوموړي زياته کړې، افغانان بايد د خپلې راتلونکي په اړه پرېکړه وکړي او ناټو به د افغانانو ملاتړ ته تر هغو دوام ورکوي څو د سولې لپاره حالات برابر شي. هغه د يوې پوښتنې په ځواب کې ويلي چې بې وسلې کول او په سوله ييز ژوندانه کې د وسله والو ورګډول بايد د سولې د پروسې برخه وي. نيکولاس وايي، د سولې له تړون وروسته په سوله ييز ژوند کې د وسله والو يو ځاى کول اړين دي، خو دا اسان کار هم نه دى. د هغه په وينا، ناټو په افغانستان کې د روزنې ماموريت پر مخ وړي، خو له اړتيا پرته په افغانستان کې نه پاتې کېږي. هغه زياتوي، سوله په څو شپو کې نه راځي، دا يوه پروسه ده چې کېداى شي وخت واخلي.