فدریکا موګیرني: د افغانانو په مشرۍ او مالکیت د سولې له خبرو ملاتړ کوو

اروپايي ټولنه د افغانانو په مشرۍ او مالکیت د سولې له پروسې ملاتړ کوي. د اروپايي ټولنې د بهرني سیاست مسوولې فدریکا موګیرني نن سهار د ملي یووالي د حکومت له اجرایه رییس ډاکټر عبدالله عبدالله سره کتلي دي. دواړو لورو په دې لیدنه کې پر بېلو مسایلو بحث کړی دی. موګیرني وایي په دې بحراني وضعیت کې یې افغانستان ته د سفر موخه دا ده، چې د سولې له پروسې خپل ملاتړ څرګند کړي او همدا راز په دې برخه کې د شته ستونزو په لرې کولو کې همکاري وکړي. نوموړې تر دې وړاندې پاکستان ته تللې وه او تر هغه وروسته افغانستان ته راغلې ده. موګیرني هیله مندي څرګنده کړې چې په افغانستان کې اوږده جګړه د خبرو له لارې حل کړل شي او په دې توګه په دغه هېواد کې د تېرو کلونو لاس ته راغلي ارزښتونه وساتل شي. ډاکټر عبدالله عبدالله هم په دې لیدنه کې د فدریکا موګیرني او همدا راز اروپايي ټولنې له همکاریو او ملاتړ مننه کړې ده.