سیاسي څېرې او ګوندونه تور پورې کوي، چې حکومت په لوی لاس د سولې هڅې سبوتاژ کوي. وروسته له دې چې سترې محکمې د ولسمشر غني دواک موده وغځوله او په قطر کې د بین الافغاني خبرو کنفرانس لغوه شو، نو پر حکومت هم نیوکې ډېرې شوې. ځینې سیاسي څېرې او ګوندونه وایي، حکومت په لوی لاس د سولې روانې هڅې سبوتاژ کوي چې دا د هېواد په ګټه نه دي.
بل پلو سره له دې چې حکومت د دوحې ناستې د لغوه کېدو پړه پر قطر واچوله، خو امریکا په یو ډول په دغه مسئله کې افغان حکومت پړ بللی دی. امریکايي لوري له افغان حکومته غوښتي، چې ژر تر ژره دې د قطر بینالافغاني مذاکراتو لپاره زمینه برابره کړي.
د سیاسي جریانونو له ډلې د افغانستان د خلاصون لارې شورا وايي، افغان حکومت د قطر ناسته او سولې پیل شوې هلې ځلې سبوتاژ کوي او ولسمشر هڅه کوي چې د مشورتي لویې جرګې په وسیله د خپل واک موده وغځوي. د دې شورا رییس سیداکبر اغا ویلي، تر سولې وړاندې د ټاکنو ترسره کول له وضعیت سره مرسته نشي کولی او ضروري ده، چې حکومت د سولې لپاره قرباني ورکړي. اکبر اغا زیاته کړې: ((دا سمه ده چې ټاکنې له سولې سره مرستې نه شي کولی. لومړی باید سوله وشي او بیا دې پر ټاکنو خبرې وشي)).
د نوې ملي جبهې رییس او د ځینو نورو سیاسي ګوندونو استازي وايي، که څه هم په کور دننه او بهر له افغانستانه د بهرنیو ځواکونو وتلو په اړه دریځونه بدل شوي او د سولې لپاره زمینه برابره شوې ده، خو حکومت د سولې بهیر یرغمل کړی دی. د دغه جبهې مشر انورالحق احدي ویلي: ((په نړیواله کچه ټول د دې پلویان دي، چې په افغانستان کې سوله وشي، خو حکومت دغه بهیر یرغمل کړی دی، دوی د سولې په لار کې خنډ جوړوي)).
افغان سیاستوال پر حکومت نیوکه کوي، چې د واک مودې غځولو لپاره د سولې هڅو پر وړاندې ننګونې راپورته کوي. دوی وایي چې حکومت دې سولې ته لومړیتوب ورکړي.
بل پلو د امریکا د بهرنیو چارو وزیر هم پرون له ولسمشر غني سره په ټلیفوني خبرو کې په افغانستان کې د سولې پر خبرو ټینګار کړی دی. هغه په یو ډول د قطر ناستې د لغوه کېدو پړه پر افغان حکومت اچولې ده، خو په ټینګار یې ترې غوښتي چې باید د لېست پر سر ستونزې ختمې کړي او د قطر بین الافغاني ناستې ته دې زمینه برابره کړي. د امریکا د بهرنیو چارو وزارت په اعلامیه کې راغلي: ((مایک پامپیو په قطر کې د پلان شوي کنفرانس پر لغو کېدو خواشیني وښوده، دواړه لوري په دې سلا شول چې د قطر بینالافغاني مذاکراتو د ترسره کېدو لپاره ژر تر ژره شرایط برابر شي او غوښتنه وشوه، چې د دې ناستې د ګډونوالو پر لېست توافق وشي، څو دغه ناسته په یوه مناسب فرصت کې ترسره شي)).
افغان سیاستوال داسې مهال حکومت د سولې پروسې پر سبوتاژولو تورنوي، چې په پام کې وه د اپرېل په ۲۰مه او ۲۱مه نېټه په قطر کې د افغان سیاستوالو او طالب استازو ترمنځ ناسته ترسره شي، خو دې ناستې ته د حکومت له لوري د ۲۵۰ کسیز هیئت له معرفي کېدو سره د طالبانو او قطر حکومت مخالفت د دې سبب شو، چې دغه ناسته د اوس لپاره لغو شي.
